ევროპული საქართველოს ლიდერი, გიგი უგულავა ამბობს, რომ ყველა ოპოზიციურმა პარტიამ საერთო პლატფორმა უნდა შექმნას, რათა საპარლამენტო პროპორციული არჩევნებისთვის იბრძოლონ. ამის შესახებ უგულავამ ბრიფინგზე ისაუბრა.

მისი თქმით, საზოგადოების დაკვეთაა, რომ ოპოზიცია იყოს უფრო აქტიური, რადიკალურები და გამოიყენონ ყველა ბერკეტი, მათ შორის, ქუჩის აქციები.

"ჩვენ უნდა დავიაროთ მთელი საქართველო და ადამიანებს ავუხსნათ, რომ დღეს ცუდად ცხოვრობენ იმიტომ რომ ხელისუფლება არის თავგასული, თავგასულია იმიტომ, რომ მას მიტაცებული აქვს საკონსტიტუციო უმრავლესობა", — განაცხადა უგულავამ.

გარდა ამისა ოპოზიციური პარტიის ლიდერმა 16 დეკემბერს ინაუგურაციის პარალელურად ველისციხესთან გამართული მოვლენები შეაფასა. უგულავას შეფასებით, პოლიციას ჰქონდა უკანონო და პოლიტიკურად მოტივირებული დავალება, რათა "ადამიანებისთვის ხელი შეეშალა".

"ჩვენ სახეზე გვქონდა კონსტიტუციისა და საქართველოს კანონმდებლობის უხეში დარღვევა საქართველოს ხელისუფლების მხრიდან. ამაზე პასუხისმგებელი არის პირადად გახარია, რომელმაც ღარიბაშვილის საუკეთესო ტრადიციებით დღეს უკვე დაუწყო ოპოზიციას და საზოგადოების ძალიან დიდ და მნიშვნელოვან ნაწილს მუქარით საუბარი".

16 დეკემბერს ინაუგურაციის პარალელურად ხმაური იყო თბილისი-კახეთის გზაზე. ერთმანეთს გაერთიანებული ოპოზიციის წევრები და პოლიცია დაუპირისპირდა. სოფელ ველისციხეში მდგომარეობა მას შემდეგ დაიძაბა, რაც გაერთიანებულ ოპოზიციას გზა გადაუკეტა პოლიციამ და თელავში ჩასასვლელად ყვარლის შემოვლითი გზით წასვლა ურჩია. ამ გზაზე ოპოზიციას ავტობუსები ელოდებოდნენ, რომლებიც აქციის მონაწილეებს თელავის მერიის მიერ პროტესტისთვის განსაზღვრულ ადგილზე გადაიყვანდნენ.

გაერთიანებული ოპოზიციის თქმით, შსს-მ შეზღუდა კონსტიტუციური უფლება, გამოხატვის თავისუფლება. შსს-სა და ქართული ოცნების წარმომადგენლები კი ერთხმად აცხადებდნენ, რომ გაერთიანებულმა ოპოზიციამ პროვოკაცია მოაწყო და მათთვის თელავში ჩამოსვლა და აქციის ჩატარების უფლება არავის შეუზღუდავს. დაპირისპირების შედეგად დაშავდნენ, როგორც პოლიციელები ისე აქციის მონაწილეები.

საქართველოს მეხუთე პრეზიდენტის სალომე ზურაბიშვილის ინაუგურაციის დასრულების შემდეგ, შინაგან საქმეთა მინისტრმა განაცხადა, რომ დაისჯება ყველა, ვისი ბრალეულობაც გამოიკვეთება. საბოლოოდ, სალომე ზურაბიშვილის ინაუგურაციის პარალელურად ოპოზიციის დაგეგმილი აქცია არ ჩატარდა.