საკრებულოში, თბილისის მერის ანგარიშის პრეზენტაცია ხმაურისა და სიტყვიერი დაპირისპირების ფონზე მიმდინარეობს. მდგომარეობა მას შემდეგ დაიძაბა, რაც თბილისის მერმა, დავით ნარმანიამ ყაზბეგის გამზირზე ხეების გაჩეხვის ფაქტზე დაიწყო საუბარი.

მან აღნიშნა, რომ ყაზბეგის 24 ნომერში გაჩეხილი ხეების საკითხს პროკურატურა იძიებს და გამოძიება დაადგენს, ვინ უნდა აიღოს პასუხისმგებლობა:

"მნიშვნელოვანია დაველოდოთ გამოძიებას და საგამოძიებო მოქმედებების დასრულების შემდგომ მივიღოთ გადაწყვეტილებები, რა გადაწყვეტილებებზეც ვსაუბრობ. ჩემი აზრით, მიზანშეუწონელია გავიშვიროთ თითი კონკრეტული ადამიანებისკენ".

ნარმანიას ამ განცხადებას გამოეხმაურა ცოტნე გამსახურდია, რომელმაც აღნიშნა, რომ გამოძიებას აზრი არ აქვს და თუ კვლევა მიმდინარეობს მაშინ მერიაში უნდა იყვნენ პროკურატურის წარმომადგენლები. აღნიშნულა ხმაური და სიტყვიერი დაპირისპირება გამოიწვია. დაცვის თანამშრომლების ჩარევის შემდეგ, სხდომაზე შესვენება გამოცხადდა.

თბილისის მერი საკრებულოს რიგგარეშე სხდომაზე საკრებულოს ოპოზიციის მოთხოვნით მას შემდეგ მივიდა, რაც ყაზბეგის გამზირზე ასწლოვანი ხეების გაჩეხვამ მოქალაქეების, არასამთავრობო სექტორისა და ოპოზიციის პროტესტი გამოიწვია.