თამამად შეიძლება ითქვას, რომ დემნა გვასალია მსოფლიოს ერთ-ერთი ყველაზე ცნობილი დიზაინერია, რომლის სახელი ყველა კონტინენტზე სმენიათ. ექსცენტრიულმა ხელოვანმა მოდაში ახალი და ამავდროულად რადიკალურად განსხვავებული სტილი დაამკვიდრა, რომელიც ადამიანთა რეალურ ყოფას ასახავს.

გვასალიამ ანდერგრაუნდ საზოგადოების და ახალგაზრდა თაობის ხმა შეიტანა მოდის სამყაროში და პოდიუმი ისევ ხელოვნებად აქცია, რომელსაც მეტყველების და ისტორიის თხრობის უნარი აქვს.

ვინაიდან ის პოდიუმზე არამხოლოდ დიზაინერი, არამედ პუბლიცისტია, ფართო აუდიტორიას თავისი ცხოვრების ყველაზე მნიშვნელოვანი და მძიმე დეტალი გაუზიარა და საქართველოს ისტორიაზე უამბო. Vetement-ის გაზაფხული-ზაფხულის 2019 წლის კოლექცია აფხაზეთის ომსა და 90-იანი წლების მძიმე წარსულს ეხება.

კოლექცია დიზაინერმა 2018 წლის ივლისში წარადგინა, თუმცა დღეს მსოფლიოს ამცნო, რომ მოდაში გადატანილი საქართველოს ტრაგიკული ისტორია 90-იანებში არ დასრულებულა და ოკუპაცია გრძელდება. Vetement-ის ოფიციალურ ინსტაგრამის ანგარიშზე საოკუპაციო ხაზთან გადაღებული მავთულხლართების ფოტო გამოქვეყნდა. ასე ამცნო გვასალიამ მსოფლიოს ოკუპაციაში მყოფი საქართველოს შესახებ უსიტყვოდ.

View this post on Instagram

VETEMENTS SPRING SUMMER 2019 - WATCH THE SHOW NOW ON IGTV

A post shared by VETEMENTS (@vetements_official) on

როგორც უკვე გიამბეთ, Vetements-ის ბოლო კოლექციაში ქართულწარწერებიანი სამოსი ჭარბობს და "ოჯახი და ძალადობა" ის მთავარი თემებია, რომლის გარშემოც აიგო კონცეფცია. გვასალიას სამოსი ქართული დამწერლობის პოპულარიზაციასაც ემსახურება. შარვლებსა თუ მაისურებს ქართული სიტყვები აწერია.

თავად დიზაინერი ამბობდა, რომ ამ კოლექციის შექმნისას ჰქონდა შეგრძნება, რომ საკუთარი დოკუმენტური ცხოვრება ტანსაცმელში გადაიტანა:

"იქ, სადაც მე ვცხოვრობდი, ომი იყო. მინდოდა, რომ ჩემი ბრაზის, შიშისა და ტკივილის წინააღმდეგ ამ შოუთი გამოვსულიყავი. ეს ისაა, რაც აქამდე არ მინდოდა, რომ გამხსენებოდა, რადგან ის წარსულში დამაბრუნებდა. გადავწყვიტე, რომ ეს უნდა გამეკეთებინა და შემოქმედებითი მხრივ, ასეთი ბედნიერი არასდროს ვყოფილვარ".

ფოტო: Vetements

ფოტო: Vetements

სრული კოლექციის ნახვა ამ ბმულზე შეგიძლიათ.