ამ წუთებში მიმდინარე საკრებულოს რიგგარეშე სხდომაზე დედაქალაქის მერმა, დავით ნარმანიამ განაცხადა, რომ ქალაქში ცოტაა გამწვანებული სივრცეეები, სკვერები და პარკები, თუმცა აღნიშნულს ის წინა ხელისუფლებას აბრალებს:

"ეს არ არის ჩვენი ხელისუფლების ბრალი. როცა ჩვენ ხელისუფლებაში მოვედით, ბევრი გაჩეხილი პარკი და სკვერი დაგვხვდა. ხელისუფლებაში მოსვლის შემდეგ ჩვენ 7 ათას კვადრატზე მეტი ტერიტორია დავუბრუნეთ საჯარო სივრცეს, მე შემიძლია ჩამონათვალიც გამოვუქვეყნო. "

ნარმანიამ აღნიშნა, რომ მერიის მუშაობის შედეგად დიღმის მეხუთე კვარტალში ამხანაგობის ტერიტორიის ჩანაცვლება მოხდა მწვანე საფარით, ასევე სანზონაში სათამაშო მოედნის ჩანაცვლება, ალექსიძის პირველში კი ახლა მიმდინარეობს ჩანაცვლების ღონისძიებები. მერმა აღნიშნა რომ ეს პროცესი შემდგომშიც გაგრძელდება.

თბილისის მერი საკრებულოს რიგგარეშე სხდომაზე საკრებულოს ოპოზიციის მოთხოვნით მას შემდეგ მივიდა, რაც ყაზბეგის გამზირზე ასწლოვანი ხეების გაჩეხვამ მოქალაქეების, არასამთავრობო სექტორისა და ოპოზიციის პროტესტი გამოიწვია.