პარლამენტის თავმჯდომარე, ირაკლი კობახიძე ოპოზიციას ვადამდელ საპარლამენტო არჩევნების მოთხოვნაზე პასუხობს და მოუწოდებს, რომ "ნუ გაიქაჩებიან იმაზე, რისი რესურსიც არა აქვთ". მისივე თქმით, შემდეგი საპარლამენტო არჩევნები ჩატარდება 2020 წლის ოქტომბერში.

"ჩვენ თავიდანვე ვამბობდით, რომ ნაციონალური მოძრაობას წაგების შემდეგ ექნებოდა აუცილებლად დესტაბილიზაციის მცდელობა, თუმცა გუშინ გამოჩნდა ის, რასაც ვამბობდით, რომ მათ ამის რესურსი ნამდვილად არა აქვთ, რომ მათ არა აქვთ ხალხის მხარდაჭერა, შესაბამისად, ისინი ვერ შეძლებენ ჩვენს პროცესებში რაიმე დესტაბილიზაციის შეტანას", — განაცხადა კობახიძემ.

გაერთიანებული ოპოზიცია არჩევნების შედეგებს არ აღიარებს. გუშინ, 2 დეკემბერს ოპოზიციამ აქცია გამართა, სადაც განაცხადეს, რომ სალომე ზურაბიშვილი მათი პრეზიდენტი არ არის. ვაშაძემ აქციის მონაწილეებს მოთხოვნები წარუდგინა: ვადამდელი საპარლამენტო არჩევნები, საარჩევნო სისტემის ძირეული ცვლილება, საოლქო კომისიების გაუქმება და საჯარო მოხელეების საარჩევნო პროცესში ჩართულობის აკრძალვა. ოპოზიციამ ხელისუფლებას 16 დეკემბრამდე მისცა დრო.

ვაშაძემ ხელისუფლებას მოუწოდა, კრიზისის დასაძლევად, შექმნან სამუშაო ჯგუფი. მისივე თქმით, გაერთიანებული ოპოზიციაც იმავე რაოდენობის დელეგაციას შექმნის. წინააღმდეგ შემთხვევაში ოპოზიცია, 16 დეკემბერს, სალომე ზურაბიშვილის ინაუგურაციის დღეს, აქციის გამართვას გეგმავს.