გაერთიანებული ოპოზიციის საპრეზიდენტო კანდიდატი, გრიგოლ ვაშაძე საარჩევნო კამპანიაში მისი შვილების ჩართვის მოწოდებას გამოეხმაურა. ვაშაძის თქმით, ეს არაევროპული საქციელია მაშინ, როცა ქართულ ოცნებას ევროპულ კამპანიაზე აქვს პრეტენზია.

"მიფორთხავენ ჩემს პირად ცხოვრებაში და რატომღაც ცდილობენ კამპანიაში ჩემი შვილები ჩარიონ. აი, ამ ძალიან ევროპელებმა, ისეთმა ევროპელებმა, რომ პირდაპირ აღარ შეიძლება მეტი", — განაცხადა ვაშაძემ.

კანდიდატმა მადლობა გადაუხადა რუსთავი 2-ის დირექტორს, ნიკა გვარამიას იმისთვის, რომ მისი ოჯახის შესახებ ინფორმაცია არ გაასაჯაროა. ვაშაძეს დამატებით დეტალებზე არ უსაუბრია. ეს პირველი შემთხვევაა, როცა კანდიდატმა საკუთარი შვილების შესახებ განცხადება გააკეთა. აქამდე დასმულ კითხვებს ის არ პასუხობდა.

ვაშაძემ აღნიშნა ისიც, რომ გვარამია სწორად მოიქცა სალომე ზურაბიშვილთან მიმართებაში. მას შემდეგ რაც ზურაბიშვილის შვილმა, თეიმურაზ გორჯესტანმა ვაშაძის შვილი დებატებში გამოიწვია ნიკა გვარამიამ პირდაპირ ეთერში ზურაბიშვილის პირადი ცხოვრების დეტალებზე ისაუბრა. მოგვიანებით კი განაცხადა, რომ არასწორად მოიქცა და ბოდიში მოიხადა.