პარლამენტის თავმჯდომარე, ირაკლი კობახიძე აცხადებს, რომ პარტია ქართული ოცნება სრულიად იზიარებს იმ ბილბორდების პათოსს, სადაც ყოფილი ხელისუფლების წევრების ფოტოებია გამოსახული წარწერით: "არა ნაცებს", "არა ბოროტებას".

ტვ პირველის ეთერში, გადაცემა რეაქციაში საუბრისას კობახიძე აღნიშნავს, რომ არამხოლოდ იზიარებენ ისინი ბილბორდების შინაარსს, არამედ მის დამკვეთ ბიზნესმენებს ქართული ოცნების შტაბმა ტექნიკური დახმარებაც გაუწია:

"ეს არ იყო ჩვენი სტრატეგიის შემადგენელი ნაწილი, ამ ბილბორდების იდეა ეკუთვნით კონკრეტულ ბიზნესმენებს, რომლებიც განიცდიდნენ კონკრეტულ რეპრესიებს ნაცმოძრაობის დროს. მე რომ მოვისმინე მათი ისტორიები, ეს იყო აბსოლუტურად შოკისმომგვრელი. იყო ორი მეღვინე, იყვნენ სხვა ბიზნესმენებიც. ჩვენ გვქონდა კომუნიკაცია მათთან, როდესაც მათ სჭირდებოდათ ლოჯისტიკური, ტექნიკური მხარდაჭერა და ეს მხარდაჭერა გამოუცხადა შტაბმა. ამ ბილბორდებში არაა ისეთი არაფერი, რასაც შეიძლება გაემიჯნო".

ბილბორდების ერთ-ერთმა დამკვეთმა რუსთავი 2-ტან ინტერვიუში აღნიშნა, რომ მათ დამზადებაში ჯამში 51 841 ლარი გადაიხადა

თბილისში გამოჩენილ ნაციონალური მოძრაობის საწინააღმდეგო ახალ ბილბორდებზე, ქართული ოცნების პრესსამსახურში ამბობენ, რომ მათი დაკვეთით არ გაკეთებულა, თუმცა ინფორმირებული იყვნენ ამის თაობაზე.

მანამდე, ენმ-ის საწინააღმდეგო ბილბორდების შეკვეთაზე გავრცელებული ინფორმაცია უარყო პატრიოტთა ალიანსის ლიდერმა, ირმა ინაშვილმა. მისი თქმით, ის იზიარებს ბანერზე გამოსაზულ სულისკვეთებას, თუმცა, ისინი მათ არ დაუკვეთავთ.

ირმა ინაშვილმა განმარტა, რომ ისინი მართლაც ამზადებენ ბანერებს, რაც 23 და 25 ნოემბერს თბილისსა და ბათუმში დაგეგმილ აქციებს უკავშირდება.