როგორც ჩანს, შენობასაც შეიძლება ჰქონდეს იდენტობის კრიზისი. მაგალითად, პიზის კოშკს აღარ უნდა, რომ ტურისტების სურათებში ყველა მასზე ხუმრობდეს და გასწორება გადაწყვიტა.

როგორც ექსპერტები ამბობენ, პიზის დახრილი კოშკი ბოლო 20 წლის განმავლობაში 4 სანტიმეტრით გასწორდა, თუმცა 57-მეტრიანი ღირსშესანიშნაობას საფრთხე არ ემუქრება, რადგან ის საკმაოდ ნელა "დგება".

"ისე გამოიყურება, თითქოს 2 საუკუნე მოაკლდა", - ხსნის ადგილობრივი პროფესორი, სალვატორე სეტისი.

როგორც პიზის უნივერსიტეტის პროფესორი ნუნზიანტე სქუეგლია ამბობს, ყველაზე გასაოცარი მაინც კოშკის სიმტკიცეა.

პიზის კოშკი შუა საუკუნეებში ააგეს. ის პირველად 1990 წელს დახურეს, რადგან შიშობდნენ, რომ წაიქცეოდა. მისი 45-სანტიმეტრიანი გადახრის გასწორება 257 მილიონი დოლარი დაჯდა.