ნიუ-იორკის ქალაქ ბუფალოში კოლეჯის სტუდენტმა აღმოაჩინა, რომ პარკინგზე დატოვებულ მის მანქანას ვიღაც დაეჯახა. ის ის იყო, სასოწარკვეთილებაში უნდა ჩავარდნილიყო, როცა ავტომობილზე დატოვებული წერილი შენიშნა.

წერილის ავტორის მიხედვით, ის მეექვსე კლასის მოსწავლე იყო, რომელმაც დაინახა, როგორ დაარტყა მის მანქანას სკოლის ავტობუსის მძღოლმა. ვრცელ ახსნასთან ერთად, ავტობუსის ამოსაცნობად, მან წერილში ნახატიც დატოვა.

ფოტო: Andrew Sipowicz

"თუ გაინტერესებს, რა დაემართა შენს მანქანას.

მას 449 ნომერმა ავტობუსმა დაარტყა.

ის აქ ყოველდღე ჩერდება, რომ მე ჩამომსვას. 5:00 საათზე.

რა მოხდა?

ის ცდილობდა, რომ გვერდი აევლო, მაგრამ შენს მანქანას დაარტყა და გაიქცა. სცადა, რომ შემოევლო და გატეულიყო, მაგრამ ვერ შეძლო. მან მანქანას დაარტყა და მე ეს ყველაფერი დავინახე.

ვწუხვარ.

მძღოლი მარცხენა მხარეს ზის და ბუფალოს საჯარო სკოლის ავტობუსს მართავს.

აი ამ ავტობუსმა დაარტყა შენს მანქანას [ნახატი].

მეექვსე კლასის მოსწავლე."

დაზარალებული ენდრიუ სიპოვიცია, რომელმაც ისტორია ტვიტერზე გამოაქვეყნა. პოსტს უკვე თითქმის მილიონი მოწონება აქვს.

"ვეხმაურები უცნობ მეექვსეკლასელს, რომელმაც რამდენიმე ათასის დაკარგვისგან მიხსნა", - დაწერა მან.

გავირუსებულ ტვიტში, სკოლის მასწავლებელმა თავისი მოსწავლე გოგოს ხელწერა ამოიცნო და დაზარალებულს დაუკავშირდა.

"მე და ჩემს ოჯახს გვსურს, რომ ეს გოგო რამენაირად დავაჯილდოოთ", - უთხრა 21 წლის ენდრიუმ BBC-ის. ის ფიქრობს, რომ გოგონამ შეჯახების მომენტი დაინახა, თუმცა მოგვიანებით დაბრუნდა იმისთვის, რომ დეტალური ახსნა დაეტოვებინა.

"მინდა მას მადლობა მოვუხადო იმისთვის, რომ ასეთი მამაცი იყო და სწორი რამ გააკეთა. არადა მისთვის უფრო მარტივი იქნებოდა, რომ სახლში წასულიყო და ყველაფერი დაევიწყებინა", - დასძენს ის.

ავტობუსების კომპანია ენდრიუს ზარალის ანაზღაურებას დაჰპირდა.