პარტია ქართული ოცნების თავმჯდომარე, ბიძინა ივანიშვილი იმ სცენარზე საუბრობს, რომელის გრიგოლ ვაშაძის საპრეზიდენტო არჩევნებში გამარჯვების შემდეგ განვითარდება.

მისი თქმით, შტაბში უთხრეს ამ თემაზე არ ესაუბრა, მაგრამ კითხვას არ გაურბის. ივანიშვილის თქმით, თუ ნაციონალურმა მოძრაობამ რევოლუციური სცენარის განვითარება სცადა სახელმწიფო კონსტიტუციურ ჩარჩოებში დარჩება.

"ვარწმუნებ საზოგადოებას, რომ გვაქვს რესურსი, რომ იგი კონსტიტუციურ ჩარჩოებში დავტოვოთ. კანონს იქით არ გავუშვებთ. კანონის ფარგლებში დავტოვებთ და ნურავის ნუ აქვს ილუზია, რომ რაღაცებს მოახერხებენ და ამოატრიალებენ", — აცხადებს ივანიშვილი.

ივანიშვილის განცხადებით, დესტრუქციული ქმედებები შეაფერხებს ეკონომიკას და შეასუსტებს ბიზნესის ინტერესს რეგიონში. ბიძინა ივანიშვილისთვის თქმით, მისთვის ყველაზე მძიმე საგარეო იმიჯი იქნებოდა.

"ამ არჩევნებით ესენი რომ აქ შემობრუნდნენ და გაფორმდეს, რომ ხალხმა არჩევანი მათზე გააკეთა, ჩვენს პარტნიორებს დავაბნევთ", — განაცხადა ივანიშვილმა ტელეკომპანია იმედის ეთერში.

პირველი შემთხვევა არ არის, როცა მმართველი გუნდი ნაციონალური მოძრაობის მხრიდან რევოლუციისა და დესტაბილიზაციის საფრთხეზე საუბრობს. მას შემდეგ, რაც საპრეზიდენტო არჩევნებში მეორე ტური დაინიშნა, ქართული ოცნების დეპუტატმა, გედევან ფოფხაძემ სამოქალაქო დაპირისპირების სცენარზეც კი ისაუბრა. გედევან ფოფხაძის პოზიცია ქართული ოცნების დეპუტატების ნაწილმა არ გაიზიარა, თუმცა ისინი მუდმივად საუბრობენ დესტაბილიზაციის საფრთხეზე საქართველოში.