საქართველოს შინაგან საქმეთა მინისტრი გიორგი გახარია აცხადებს, რომ წარმოდგენა არ აქვს, რა ჩანაწერებზე საუბრობს რუსთავი 2-ის გენერალური დირექტორი ნიკა გვარამია, რომლის გამოქვეყნებასაც მისივე თქმით, სახელმწიფო უსაფრთხოების სამსახური გეგმავს.

გიორგი გახარია ამბობს, რომ სამაგიეროდ, დეტალურად იცის ის გეგმები, რაც წინასაარჩევნოდ დესტაბილიზაციისა და პროვოკაციის მომზადებას ეხება.

"წარმოდგენა არ მაქვს საერთოდ, რა ჩანაწერებზე საუბრობს გვარამია, თუმცა დეტალურად ვიცი ყველაფერი, რაც იგეგმებოდა, დესტაბილიზაციის და პროვოკაციების მოსამზადებლად და გარწმუნებთ, რომ როგორც ნეიტრალური უწყება შინაგან საქმეთა სამინისტრო სახელმწიფო უსაფრთხოების სამსახურთან ერთად, ეს ყველაფერი გამოვლენილი გვაქვს, დეტალურ ყველა დონეზე ვიცით, ვინ, სად, როდის და რას გეგმავდა და რას გეგმავს", — განაცხადა გიორგი გახარიამ, რომლის კომენტარიც შს მინისტრმაც გაავრცელა.

მისი განცხადებით, არჩევნები ჩატარდება მშვიდ და უსაფრთხო გარემოში და ამის გარანტიას იძლევა შინაგან საქმეთა სამინისტრო.

რუსთავი 2-ის გენერალური დირექტორის, ნიკა გვარამიას განცხადებით, სახელმწიფო უსაფრთხოების სამსახური გამოსაქვეყნებლად მიხეილ სააკაშვილისა და ნიკა გვარამიას საუბრის ჩანაწერს ამზადებს.