პარტია ქართული ოცნების დამფუძნებელი და თავმჯდომარე, ბიძინა ივანიშვილი აცხადებს, რომ გუნდში დაწინაურება პროფესიონალიზმის ნიშნით მოხდება და არა ერთგულების. ამის შესახებ ივანიშვილმა ტელეკომპანია იმედის ეთერში ინტერვიუს დროს განაცხადა.

მისი თქმით, ძლიერ სახელმწიფოს ძლიერი მხარდაჭერა სჭირდება და მან იცის, როგორ გააძლიეროს გუნდი. ივანიშვილი აცხადებს, რომ გამოწვევებთან გასამკლავებლად, პირველ რიგში, კადრების სწორად შერჩევაა აუცილებელი.

ის ადასტურებს, რომ გუნდში კადრებს გადაახალისებს და შეფასების ახალ მეთოდს დანერგავს, რომელიც "სწორი სტიმული იქნება".

"გაუგებარი გუნდურობაა, როცა მიაჩნიათ, რომ გუნდში უნდა იყოს ის, ვინც კარგად ემსახურება გუნდის ინტერესებს. გუნდის ინტერესი უნდა იყოს ხალხის სამსახური. ვიცი, როგორ დავნერგო მეთოდი, რომ შეფასდეს მათი პროფესიონალიზმი, რათა მათი დაწინაურება და სწორ ადგილზე გადახალისება მოხდეს. ერთგულების ნიშნით გუნდში დაწინაურება და ადგილების დაკავება ვეღარ მოხდება, მხოლოდ პროფესიონალიზმი განაპირობებს კადრების ცვლას" — განაცხადა ივანიშვილმა.

მას შემდეგ, რაც არჩევნების მეორე ტური დაინიშნა, მმართველმა პარტიამ საკუთარ შეცდომებზე დაიწყო საუბარი.

"სამწუხაროდ, როგორც ყველა ხელისუფლებას, ჩვენც ძალაუფლების კონცენტრაცია, შეიძლება ითქვას, რომ გადაჭარბებული თვითდაჯერებულობა შეგვმატა და მთელ რიგ შემთხვევებში არ ხდებოდა ადეკვატური კომუნიკაცია საზოგადოებასთან", — აღნიშნა კალაძემ.

მისი თქმით, საზოგადოებისგან გზავნილი მიღებულია და მზად არიან ამ გამოწვევას უპასუხონ.