საპარლამენტო უმცირესობის წევრი, გიგა ბოკერია ამბობს, რომ უმრავლესობის დეპუტატების განცხადებები უპასუხისმგებლოა და ლარის კურსზე უარყოფითად აისახება. ამის შესახებ მან პარლამენტის პლენარულ სხდომაზე ფინანსთა მინისტრისთვის, ივანე მაჭავარიანისთვის მიმართვის ტექსტში ისაუბრა.

"თქვენ მოისმინეთ თუ არა, ტელევიზორს თუ რთავთ, თქვენი პოლიტიკური თანაგუნდელების, აი, აქ რომ სხედან, ნაწილის განცხადებები, რომ ოპოზიცია თუ მოიგებს, იქნება სამოქალაქო ომიო და მერე სხვების განცხადებები, დღესაც ვრცელდება, რომ ოპოზიცია თუ წააგებს, ოპოზიცია მოაწყობს არეულობასო. ერთი პასუხი გამეცით, არის თუ არა ეს უპასუხისმგებლო, მავნებლური და საზიანო განცხადებები და, თუ ამაში მეთანხმებით და უნდა დამეთანხმოთ, რომ ეს არის მავნებლობა და უპასუხისმგებლობა, აი, ეს თქვენი განცხადება, რომ ლარის კურსის ვარდნა არის ოპოზიციის სიბინძურის და რიტორიკის ბრალი, აქ აგერიათ და ქართული ოცნება უნდა გეთქვათ? ივანიშვილის გუნდს გულისხმობდით და ოპოზიცია წამოგცდათ?" — ჰკითხა უმცირესობის დეპუტატმა ფინანსთა მინისტრს.

საპრეზიდენტო არჩევნების დასრულების შემდეგ, როცა ცნობილი გახდა, რომ მეორე ტური გაიმართებოდა, საპარლამენტო უმრავლესობის დეპუტატმა, გედი ფოხაძემ თქვა, რომ თუ გრიგოლ ვაშაძე გაიმარჯვებს სამოქალაქო ომი დაიწყება.