ქართული ოცნების ოფისის წინ თემირლან მაჩალიკაშვილის ოჯახის წევრები და მხარდამჭერები საპროტესტო აქციას მართავენ. აქციას მსვლელობის სახე ჰქონდა და ის პარლამენტიდან დაიწყო. მსვლელობაში მონაწილეობა მიიღეს პანკისელებმაც.

აქციის მონაწილეები თემირლანის სიკვდილში სახელმწიფო უსაფრთხოების სამსახურის უფროსის ყოფილ მოადგილეს, სოსო გოგაშვილს ადანაშაულებენ.

საპროტესტო აქციაზე სიტყვით გამოვიდნენ თემირლან მაჩალიკაშვილის მშობლები, ბიძა და ბებია. ისინი ითხოვენ, რომ თემირლანის მკვლელები და მკვლელობაში მონაწილე პირები დაისაჯონ.

ფოტო: თამუნა გეგიძე / On.ge

ფოტო: თამუნა გეგიძე / On.ge

ფოტო: თამუნა გეგიძე / On.ge

ფოტო: თამუნა გეგიძე / On.ge

2017 წლის 21-22 ნოემბრის ისნის სპეცოპერაციის შედეგად სუს-მა დააკავა დანაშაულებრივი ჯგუფის ერთი პირი და სამი წევრის ლიკვიდირება მოახდინა.

რამდენიმე კვირის შემდეგ, 26 დეკემბერს, პანკისში, ახმედ ჩატაევთან და მის თანამზრახველებთან კავშირის ბრალდებით რუსლან ალდამოვთან ერთად ოთხი პირი დააკავეს.

სახელმწიფო უსაფრთხოების სამსახურის ინფორმაციით, 19 წლის თემირლან მაჩალიკაშვილმა დაკავებისას წინააღმდეგობის გაწევა და ხელყუმბარის გამოყენება სცადა, რის გამოც სპეცრაზმელებმა მას ესროლეს. მაჩალიკაშვილმა სასიკვდილო დაზიანება თავის არეში მიიღო და რამდენიმე დღეში საავადმყოფოში გარდაიცვალა. მაჩალიკაშვილის ოჯახი სუს-ის ვერსიას არ იზიარებს და ამბობს, რომ თემირლანი მოკლეს. ოჯახის წევრები ამბობენ, რომ სპეცოპერაციის ღამეს მათთან სუს-ის უფროსის მაშინდელი მოადგილე სოსო გოგაშვილი იყო ჩასული და ემუქრებოდა.

გოგაშვილი 21 აგვისტოს მოულოდნელად თანამდებობიდან გადადგა.