დღეს, 12 ნოემბერს, 4 საათზე, არასამთავრობო ორგანიზაციები მმართველი გუნდის მიერ მხარდაჭერილ კანდიდატს, სალომე ზურაბიშვილს შეხვდებიან და უშუალოდ მისგან მოისმენენ მუქარის შემცველი შეტყობინებების შესახებ დეტალურ ინფორმაციას. არასამთავრობო ორგანიზაციები და სადამკვირვებლო მისიის წარმომადგენლები სასტუმრო რუმსში შეხვედრაზე თავად სალომე ზურაბიშვილმა მიიწვია. On.ge-ს ახალგაზრდა იურისტთა ასოციაციაში განუცხადეს, რომ ისინი თანხმდებიან მიწვევას და ინფორმაციას უშუალოდ მისგან მიიღებენ.

ხელისუფლების მიერ მხარდაჭერილმა კანდიდატმა, სალომე ზურაბიშვილმა საგანგებო ბრიფინგზე განაცხადა, რომ მას და მის შვილებს მოკვლით ემუქრებოდნენ.

მან დახმარებისთვის არასამთავრობო ორგანიზაციებს მიმართა და შეახსენა, რომ პირველად მათ სხვა საკითხზე 11 ოქტომბერს მიმართა, თუმცა მათი მხრიდან რეაგირების გარეშე დარჩა.

სალომე ზურაბიშვილის "გაუგებრობა" არასამთავრობოებთან მას შემდეგ დაიწყო, რაც 2 ოქტომბერს ახალციხეში, ახალქალაქსა და ნინოწმინდაში მოსახლეობასთან შეხვედრისას ქსენოფობიური შინაარსის განცხადება გააკეთა და უარყოფით კონტექსტში მოიხსენია მიხეილ სააკაშვილის მიერ თურქებისთვის საქართველოს მოქალაქეობის მინიჭება. ამ განცხადების გამო 15-მა NGO-მ ზურაბიშვილი გააკრიტიკა და მისი განცხადება ქსენოფობიურად შეაფასა.

ზურაბიშვილმა არასამთავრობოებს 5 ოქტომბერს რუსთაველის თეატრში გამართულ წინასაარჩევნო შეხვედრაზე უპასუხა. ზურაბიშვილის თქმით, მის წინააღმდეგ "არანაირი მტკიცებულების საფუძველზე გაილაშქრეს" არასამთავრობოებმა, რომელთაც "სიძულვილის ლექსიკის დასაგმობად სიტყვა არ დაუძრავთ".

ამის შემდეგ სალომე ზურაბიშვილმა არასამთავრობოებთან შეხვედრისა და თანამშრომლობის სურვილი გამოთქვა. მისივე თქმით, არასამთავრობო სექტორს პატივს სცემს და "როგორც პრეზიდენტს", მათთან ურთიერთობა დასჭირდება.