თბილისის მერიამ 5 ნოემბერს შვილმკვდარ მამას, ზაზა სარალიძეს, რომელიც შვილის მკვლელების დასჯას ითხოვს, წერილი მიწერა. წერილში მერია ითხოვს, რომ სარალიძემ აქცია თბილისში, პარლამენტის შენობის მიმდებარე ტერიტორიის ნაცვლად სხვა ადგილზე გამართოს.

"პარლამენტის შენობის წინ, 15 დეკემბერს იმართება თბილისის მთავარი ნაძვის ხის ანთების ცერემონიალი, რომლის ფარგლებშიც თბილისის მოსახლეობისთვის და განსაკუთრებით, ბავშვებისთვის ტარდება სხვადასხვა სახის გასართობი აქტივობები და კონცერტები, რაც შესაბამისად, გულისხმობს ხანგრძლივ მოსამზადებელ პერიოდს", — განმარტავს თბილისის მერია წერილში და სარალიძეს ამ გარემოების გათვალისწინებით აქციის გასამართი ადგილის შეცვლის თხოვნით მიმართავს.

ზაზა სარალიძისთვის კონსტიტუციური უფლების, კარვის გაშლის უფლების შეზღუდვის გამო 10 ნოემბერს აქცია გამართეს არასამთავრობო ორგანიზაციებმა.