რუსთავი 2 სამხედრო ექსპერტების შეფასებებს ავრცელებს დღეს, სუს-ის მიერ, გაკეთებულ განცხადებაზე.

სამხედრო ექსპერტი, ნოდარ ხარშილაძე, სახელმწიფო უსაფრთხოების სამსახურში გაკეთებულ განცხადებას, ქვეყანაში ტერაქტის აღკვეთის საქმესთან დაკავშირებით, წინასარჩევნოდ გამოყენების მცდელობად აფასებს.

"ეს ტერორიზმი ვერანაირად ვერ იქნება, ამ შემთხვევაში ვერანაირად. უნდა იყოს სამოქალაქო პირთა წინააღმდეგ ძალადობა, უნდა იყოს გზავნილის გავრცელების მიზნით, ან იდეოლოგია უნდა ჰქონდეს ჯგუფს ან პოლიტიკური ან რელიგიური. ეს უფრო დივერსიის აქტია. ეს წინასაარჩევნოდ გამოყენების მცდელობა არის, ამას ბოლომდე არ იტყვიან, ეცდებიან რომ ისეთი შთაბეჭდილება დატოვონ, თითქოს ეს კვალი აღმოაჩინეს. ჩემი აზრით, იაფფასიანი პოლიტიკური ხრიკია. ჩანასახშივე, ამ ეტაპზე, იმის თქმა, რომ [ამაში მონაწილეობდა] უკრაინა, სერიოზული გამოძიების პირობებში, აბსოლუტურად შეუძლებელია".

სამხედრო ექსპერტი ზურაბ აგლაძე კი მიიჩნევს, რომ სუს-ში გაკეთებულმა განცხადებამ შესაძლოა ქვეყნებს შორის ურთიერთობებზე ცუდი ზეგავლენა მოახდინოს.

"ჩვეულებრივი დივერსიაა და არ არის ტერორისტული აქტი. შემიძლია გამოვრიცხო, რომ უკრაინის სახელმწიფო ამ აქტში ჩარეული იყოს, წინასწარ განცხადებების გაკეთება ორი ქვეყნის ურთიერთობებს და გამოძიებას დააზიანებს"- აცხადებს აგლაძე.

სახელმწიფო უსაფრთხოების სამსახურის ინფორმაციით, კონტრდაზვერვის დეპარტამენტმა ტერორისტული აქტი აღკვეთა, რომლის შედეგადაც სოფელ საგურამოს მიმდებარე ტერიტორიაზე, მდინარე არაგვზე გამავალი რუსეთ-სომხეთის დამაკავშირებელი გაზსადენი მილის ღია მონაკვეთის აფეთქება იგეგმებოდა. ტერაქტის მომზადების ბრალდებით დღეს შვიდი პირი დააკავეს.