შინაგან საქმეთა სამინისტროს ინფორმაციით, სამძებრო და საგამოძიებო ღონისძიებების შედეგად, წარსულში ორჯერ ნასამართლევი, 1989 წელს დაბადებული სეით ს. ყაჩაღობის ბრალდებით დააკავეს.

უწყების ცნობით, 2015 წლის 28 ნოემბერს ნიღბითა და ცეცხლსასროლი იარაღით შეიარაღებული სეით ს. ორ თანამზრახველთან ერთად ჩოხატაურში ზაალ მ.-ს საცხოვრებელ სახლში შეიჭრა, ოჯახის წევრებს ფიზიკური შეურაცხყოფა მიაყენა და იარაღის მუქარით ფული და ძვირფასეულობა გამოსძალა:

"ამის შემდეგ სეით ს.-მ და მისმა თანამზრახველებმა ზაალ მ.-ს კუთვნილი ავტომანქანა გაიტაცეს და შემთხვევის ადგილიდან მიიმალნენ. პოლიციამ გატაცებულ ავტომანქანას შემთხვევიდან მეორე დღეს სამტრედიაში, ერთ-ერთ ქუჩაზე მიაკვლია".

შსს-ს ინფორმაციით, სეით ს. ქუთაისში, საკუთარ საცხოვრებელ სახლში დააკავეს, მისი თანამზრახველების დაკავების მიზნით კი, შესაბამისი ოპერატიულ-სამძებრო ღონისძიებები ისევ მიმდინარეობს.

როგორც უწყება განმარტავს, გამოძიება ბინაში უკანონო შეღწევით, ჯგუფურად ჩადენილი ყაჩაღობის ფაქტზე სისხლის სამართლის კოდექსის 179-ე მუხლის მეორე ნაწილის ბ და გ ქვეპუნქტებით, ასევე მესამე ნაწილი ბ ქვეპუნქტით მიმდინარეობს.