რუსთაველზე აქციის მონაწილეებისთვის კარვების გაშლის უფლების შეზღუდვაზე სასამართლო პროცესი გადაიდო, რადგან შინაგან საქმეთა სამინისტრომ საიდუმლო მასალად წოდებული მტკიცებულებები ამ დრომდე ვერ წარმოადგინა.

მოსამართლის პოზიციით, შინაგან საქმეთა სამინისტროს, წინა სასამართლოს სხდომის შემდეგ საკმარისი დრო ჰქონდა, რათა გასაიდუმლოებული მასალები დაემუშავებინა და პროცედურის შესაბამისად სასამართლოში წარედგინა.

"როგორც ჩანს ადასტურებთ, რომ შეზღუდვას ქონდა ადგილი და გინდათ დაამტკიცოთ, რომ ლეგიტიმური იყო ეს შეზღუდვა. აქ უთითებთ, რომ მოსარჩელის დაცვის ინტერესით იყო განპირობებული კარვების გაშლის უფლების შეზღუდვა, მაგრამ ვერ უთითებთ დოკუმენტს, რითაც ამას ამტკიცებთ. მესმის, რომ საიდუმლო საბუთებზე საუბრობთ, მაგრამ ეს დრო საკმარისი იყო, თითქმის თვე გავიდა, რომ წარმოგედგინათ", — განაცხადა მოსამართლემ პროცესზე.

ხორავას ქუჩაზე მოკლულის მამის ზაზა სარალიძის განცხადებით, არანაირი საიდუმლო ინფორმაცია არ არსებობს და კარვების გაშლისთვის ხელის შეშლა ხელისუფლების, კონკრეტულად კი ბიძინა ივანიშვილის დავალებაა.

"ეს საკითხი სპეციალურად იწელება, რომ კარვის გაშლის უფლების მონიჭება გადაიდოს", — განაცხადა ზაზა სარალიძემ.

შინაგან საქმეთა სამინისტროს წარმომადგენლები შეთანხმდნენ, რომ გასაიდუმლოებულ დოკუმენტებს სასამართლოს 15 ნოემბრამდე წარუდგენენ, რის შემდეგაც პროცესი გადაიდო.

თბილისის საქალაქო სასამართლოში შსს-სა და საპატრულო პოლიციის დეპარტამენტის წინააღმდეგ ზაზა სარალიძემ და მალხაზ მაჩალიკაშვილმა სარჩელი შეიტანეს. ისინი პარლამენტის შენობის მიმდებარე ტერიტორიაზე კარვის განთავსების შესაძლებლობის შეზღუდვას ასაჩივრებენ.