დღეს, 14 აპრილს, პერსონალურ მონაცემთა დაცვის ინსპექტორმა, ევროპელ ექსპერტებთან ერთად, საკანონმდებლო ცვლილებების პროექტი წარადგინა, რომლის თანახმადაც პერსონალურ მონაცემთა დაცვის შესახებ კანონში ცვლილებები უნდა განხორციელდეს, რომელთა მიზანი საერთაშორისო და ევროპულ სტანდარტებთან ჰარმონიზაცია, პრაქტიკაში გამოვლენილი ხარვეზების აღმოფხვრა და ინსპექტორის აპარატის მუშაობის ეფექტურობის გაზრდაა. კანონპროექტის მიხედვით, ცვლილებები 8 სხვა კანონშიც უნდა შევიდეს.

მიღების შემთხვევაში, პერსონალურ მონაცემთა დაცვის შესახებ კანონში შემდეგი ცვლილებები შევა:

  • კანონის მოქმედების სფეროს დაზუსტება და გაფართოება
  • მონაცემთა დამუშავების პრინციპის მკაფიოდ ჩამოყალიბება
  • მონაცემთა დამუშავების საფუძვლების დახვეწა
  • განცხადების განხილვისა და ინსპექტირების განხორციელების მარეგულირებელი ნორმების ცვლილება
  • აუდიო მონიტორინგის რეგულირება და ვიდეოთვალთვალის რეგულირების დახვეწა

როგორც პერსონალურ მონაცემთა დაცვის ინსპექტორმა, თამარ ქალდანმა, განმარტა, წარმოდგენილი ცვლილებები ეხება როგორც მოქალაქის უფლებებს, ისე სხვადასხვა ორგანიზაციების ვალდებულებებსა და სანქციების გამკაცრებას იმ შემთხვევაში, თუ ბევრი ადამიანის უფლება დაირღვევა. მისი თქმით, ცვლილებები ნაწილობრივ ეხება ფარულ საგამოძიებო მოქმედებებზე ინსპექტორის ზედამხედველობის მანდატისა და კანონის მოქმედების სფეროს გაფართოებასაც.

წარმოდგენილი კანონპროექტი მონაცემთა დამმუშავებლების თეთრი და შავის სიის შექმნასაც გულისხმობს, სადაც აისახება ინფორმაცია იმ ორგანიზაციების შესახებ, რომლებიც პერსონალური მონაცემების დაცვის კანონდმებლობით შესრულების მაღალი სტანდარტით გამოირჩევიან, ან უხეშად არღვევენ მას:

"მონაცემებს პრაქტიკულად ამუშავებს ყველა საჯარო და კერძო ორგანიზაცია. მოქალაქეებს მეტი ინფორმაცია სჭირდებათ სანდოობის თვალსაზრისით, სად არის მათი მონაცემები უკეთ დაცული".

რაც შეეხება ფარული თვალთვალთან დაკავშირებულ ცვლილებებს, ქალდანმა აღნიშნა, რომ ინფორმაციული უსაფრთხოების აუდიტი ერთ-ერთი მნიშვნელოვანესი საკითხია, თუმცა, უშუალოდ ვინ მოახდენს აუდიტს, პერსონალურ მონაცემთა დაცვის ინსპექტორი თუ კონტრაქტორი, ამაზე პარლამენტთან ერთად სულ მალე იმსჯელებენ.