2018 წლის საპრეზიდენტო არჩევნების მონაცემების დათვლამ აჩვენა, რომ პირველი ტურით გამარჯვებული კანდიდატი ვერ გამოვლინდა. საქართველოს კანონმდებლობით, პრეზიდენტმა ხმათა ნახევარზე მეტი უნდა მიიღოს, თუმცა სახელისუფლებო კანდიდატმა სალომე ზურაბიშვილმა (38,64%) და გაერთიანებული ოპოზიციის კანდიდატმა გრიგოლ ვაშაძემ (37,74%) ზღვარი ვერ გადალახეს.

საქართველოს საარჩევნო კოდექსით, არჩევნების მეორე ტური ინიშნება პირველი ტურის შედეგების ოფიციალურად გამოცხადებიდან ორი კვირის თავზე. არჩევნების მეორე ტურს ცესკო აცხადებს. უწყებას პირველი ტურის შედეგების გამოსაცხადებლად 20 დღე აქვს.

ცესკოს თავმჯდომარემ, თამარ ჟვანიამ პრესკონფერენციაზე განაცხადა, რომ ამ ვადების გათვალისწინებით მეორე ტური ყველაზე გვიან 2 დეკემბერს დაინიშნება.