ყოფილმა პრემიერ-მინისტრმა და პარტია ქართული ოცნების დამფუძნებელმა, ბიძინა ივანიშვილმა ლარის გაუფასურება მცურავი კურსით ახსნა. მისი განცხადებით, მთავრობა ყველაფერს აკეთებს, რომ მოსახლეობა ლარის გაუფასურების რისკებისგან დაიცვას, თუმცა კოორდინაციას ძირითადად ეროვნული ბანკი უწევს.

როგორც ივანიშვილმა ჟურნალისტებთან საუბრისას აღნიშნა, ლარის გაუფასურება დოლარის გარდა, კიდევ ცხრა ძირითად სავაჭრო პარტნიორზეა დამოკიდებული.

"მეც კი არ ვარ საკმარისად პროფესიონალი, რომ კარგი განმარტებები გავაკეთო, მაგრამ ხელისუფლებას ნუ ადანაშაულებთ, ეროვნულ ბანკსაც. ეს ეკონომიკა რაც გვაქვს ესაა. ის რაც ხდება გარეთ, მცირე კი არა, დიდი ეკონომიკებიც კი ვერ უმკლავდებიან", — ამბობს ივანიშვილი.

ქართულ ოცნების დეპუტატი, რომან კაკულია ფიქრობს, რომ "ლარს სჭირს ერთი დიდი ქრონიკული დაავადება". ივანიშვილის მსგავსად დეპუტატიც ამბობს, რომ ლარის კურსზე საგარეო ფაქტორები მოქმედებს და მდგომარეობის გამოსასწორებლად ხელისუფლებამ გრძელვადიანი გეგმა უნდა შეიმუშაოს.

ეროვნული ბანკის ცნობით, 26 ოქტომბრის მონაცემებით ერთი აშშ დოლარის ფასი 2,7 ლარია. რაც შეეხება ევროს, მისი ყიდვა 3,08 ლარადაა შესაძლებელი.