პარლამენტში ქართული ოცნების დეპუტატი რომან კაკულია ლარის გაუფასურებას გამოეხმაურა და აღნიშნა, რომ "ლარს სჭირს ერთი დიდი და ქრონიკული დაავადება". მისივე თქმით, ვალუტის კურსზე საგარეო ფაქტორებიც მოქმედებს.

"ეს გახლავთ ჩვენი სავაჭრო ბალანსი, რომლის მყისიერი ცვლილება შეუძლებელია და ამიტომ, ის მოწყვლადია. ჩვენს ლარს სჭირს ჩვენი ეკონომიკის დღევანდელი მდგომარეობა, რომელსაც ემატება შემდეგ, რა თქმა უნდა, ძალიან მძიმე საგარეო ფაქტორები. აქ თამაშობს ძალიან დიდ როლს უკვე ამ ყველაფრის გამო ჩამოყალიბებული მოლოდინი და ნაკლები ნდობა ლარის მიმართ და ამ ყველაფერს სჭირდება გრძელვადიანი მკურნალობა", — აღნიშნა კაკულიამ.

კაკულიას თქმით, მდგომარეობის გამოსასწორებლად ხელისუფლებამ გრძელვადიანი გეგმა უნდა შეიმუშაოს.

ეროვნული ბანკის ინფორმაციით, 2018 წელს ლარი დოლართან მიმართებით რეკორდულად გაუფასურდა. მხოლოდ ბოლო ერთ კვირაში ლარი რვა თეთრით გაუფასურდა. ერთი დოლარი 2,7 ლარი ღირს, ხოლო ერთი ევრო — 3,11 ლარი.