გარდაბნის მაჟორიტარი დეპუტატი, სავალან მირზოევი და მარნეულის მაჟორიტარი დეპუტატი, რუსლან გაჯიევი აზერბაიჯანის საელჩოს წარმომადგენლებთან და სოკარის პრეზიდენტთან, როვნაგ აბდულაევთან ერთად გარდაბნისა და მარნეულის მოსახლეობას შეხვდნენ. თავდაპირველად ინფორმაცია მარნეულის სათემო რადიომ გაავრცელა.

შეხვედრა სოკარის მიერ აშენებულ ჩაის სახლის შენობაში, აზერბაიჯანული სამზარეულოს რესტორან მუღამში მიმდინარეობდა.

შეხვედრა პარტია ნაციონალური მოძრაობის წევრმა აზად ქარიმოვმა გააპროტესტა. მისი თქმით, აზერბაიჯანის მთავრობა 2016 წელს საპარლამენტო არჩევნებში ჩაერია და ამ შეხვედრით იგივე საშიშროებას ახლაც ხედავს.

შეხვედრის მონაწილემ, გარდაბნის მაჟორიტარმა დეპუტატმა, სავალან მირზოევმა On.ge-ს განუცხადა, რომ შეხვედრაზე საპრეზიდენტო არჩევნებზე საუბარი არ ყოფილა. მისი განმარტებით, ეს იყო სოკარის პრეზიდენტის ოფიციალური ვიზიტი და შეხვედრისას ძირითადი დრო ქართული ენის სწავლას დაეთმო.

"არანაირი პოლიტიკური საკითხები მანდ არ ყოფილა. იყო საუბარი ქართული ენის სწავლაზე, სოციალურ საკითხებზე. მსგავსი შეხვედრები ძალიან ბევრჯერ ჩატარებული. ეს შეხვედრა ოფიციალური ვიზიტის ფარგლებში ჩაინიშნა. თითო რაიონიდან 3-4 კაცი იყო და თქვენ როგორ წარმოგიდგენიათ ეს 3-4 კაცი იყო სიტყვის მთქმელი. არც ერთი პარტიული აქტივისტი, ან აგიტატორი იქ არ ყოფილა", — განაცხადა დეპუტატმა.

როვნაგ აბდულაევი პრეზიდენტ ალიევის ხელისუფების ერთ-ერთი გავლენიანი მაღალჩინოსანია. აზერბაიჯანის ბიუჯეტის 65% სწორედ სოკარის მიერ გადარიცხული თანხებით ივსება.