შინაგან საქმეთა სამინისტრო პარტია გირჩის მიერ დაანონსებულ მარიხუანის ლეგალიზების ფესტივალს ეხმაურება. შსს აცხადებს, რომ გირჩის მიერ დაანონსებულ ფესტივალს ისინი აფასებენ, როგორც დანაშაულის განზრახვის ორგანიზებას, სამართალდარღვევების ჩადენისაკენ მოწოდებასა და მოქალაქეთა წახალისებას, ჩაებან კანონსაწინააღმდეგო ქმედებებში.

გირჩის მიერ გავრცელებულ განცხადებასთან დაკავშირებით შსს-მ გამოძიება დაიწყო სისხლის სამართლის კოდექსის 2731 მუხლის მეორე და მესამე ნაწილებით, რაც გულისხმობს ნარკოტიკული საშუალება მარიხუანის უკანონო შეძენა-შენახვასა და გასაღებას.

"თუკი ფესტივალზე ადგილი ექნება კანაფის გასაღებას ან ფლობას, მოხმარებას თუ პოპულარიზაციას, პოლიცია ყველა სამართალდამრღვევი პირის მიმართ გაატარებს საქართველოს კანონმდებლობით გათვალისწინებულ მკაცრ ზომებს", — აცხადებენ შსს-ში.

პოლიტიკური გაერთიანება გირჩი 20 ოქტომბერს მარიხუანის ლეგალიზების აღსანიშნავი ფესტივალის გამართვას გეგმას. ამის შესახებ ინფორმაცია თავდაპირველად პირველი არხის ეთერში გირჩის ერთ-ერთმა ლიდერმა, იაგო ხვიჩიამ გაავრცელა.

იაგო ხვიჩიას თქმით, დედა-ენის ბაღში მისული ხალხი, მათ შორის ტურისტებიც მარიხუანის ყიდვასა და მოხმარებას თავისუფლად შეძლებენ.