სტატისტიკის ეროვნული სამსახურის მონაცემებით, ბოლო ცხრა თვეში, იანვარ-სექტემბერში, საქართველოდან ევროკავშირის ქვეყნებში 533 მლნ. აშშ დოლარის ღირებულების საქონელი გავიდა.

საქსტატის ცნობით, ეს რიცხვი 13,2 პროცენტით აღემატება წინა წლის შესაბამისი პერიოდის მაჩვენებელს და ქვეყნის მთლიანი ექსპორტის მეხუთედზე მეტია (21,8%). იმავე პერიოდში ევროკავშირის ქვეყნებთან იმპორტმა 1 950,4 მლნ. აშშ დოლარს მიაღწია, რაც 21,5 პროცენტით მეტია და მთლიანი იმპორტის 29,2 პროცენტი შეადგინა.

სავაჭრო ბრუნვამ ევროკავშირის ქვეყნებთან 2 483,4 მლნ. აშშ დოლარი შეადგინა, რაც წინა წლის შესაბამისი პერიოდის მაჩვენებელს 19,6 პროცენტით აღემატება. რაც შეეხება სავაჭრო დეფიციტს, 2018 წლის იანვარ-სექტემბერში მთლიან უარყოფით სავაჭრო ბალანსში მისი წილი 33,5 პროცენტით განისაზღვრა.

ბოლო ცხრა თვეში საქართველოდან დსთ-ის ქვეყნებში განხორციელებული ექსპორტის მოცულობა 1 161,6 მლნ. აშშ დოლარით განისაზღვრა, რაც 47,2 პროცენტით აღემატება წინა წლის შესაბამისი პერიოდის მაჩვენებელს.

საქსტატის ცნობით, იანვარ-სექტემბრის წინასწარი შედეგებით საგარეო სავაჭრო ბრუნვამ, არადეკლარირებული ვაჭრობის გარეშე, 9 124,8 მლნ. აშშ დოლარი შეადგინა, რაც წინა წლის შესაბამისი პერიოდის მაჩვენებელს 20,8 პროცენტით აღემატება. აქედან ექსპორტი 2 448,1 მლნ. აშშ დოლარს შეადგენს (25.7 პროცენტით მეტი), ხოლო იმპორტი 6 676,7 მლნ. აშშ დოლარს (19,1 პროცენტით მეტი).

საქართველოს უარყოფითმა სავაჭრო ბალანსმა 2018 წლის იანვარ-სექტემბერში 4 228,6 მლნ. აშშ დოლარი და საგარეო სავაჭრო ბრუნვის 46,3 პროცენტი შეადგინა.

2018 წლის იანვარ-სექტემბერში ათი უმსხვილესი საექსპორტო ქვეყნის წილმა საქართველოს მთლიან ექსპორტში 71,8 პროცენტი შეადგინა. უმსხვილესი პარტნიორი სამეული შემდეგნაირად გამოიყურება:

  • აზერბაიჯანი (343 მლნ. აშშ დოლარი);
  • რუსეთი (314,7 მლნ. აშშ დოლარი);
  • სომხეთი (199,2 მლნ. აშშ დოლარი).