სახალხო დამცველის, ნინო ლომჯარიას განცხადებით, პროკურატურამ უნდა დაიწყოს გამოძიება, უსმენენ თუ არა ფარულად ხორავას ქუჩის საქმეზე დანაშაულის შეუტყობინებლობისთვის დაკავებული მირზა სუბელიანისა და სხვა პირების საუბარს. მისი თქმით, ბოლოს გავრცელებული "სუბელიანის ჩანაწერის" მიმართ არსებობს კითხვის ნიშნები და უნდობლობა.

"წესით, ეს შეხვედრები და საუბრები უნდა იყოს კონფიდენციალური. ეს მიანიშნებს იმაზე, რომ გარკვეული პრობლემები ამ თვალსაზრისით არსებობს ციხეში", — აღნიშნა ლომჯარიამ რუსთავი 2-თან საუბრისას.

როგორც პროკურატურის პრესსამსახურმა On.ge-სთან საუბრისას განაცხადა, მირზა სუბელიანის საქმეზე გამოძიება სასჯელაღსრულების დაწესებულებებში შესაძლო ფარულ მიყურადებასაც მოიცავს.

საქართველოს პროკურატურამ "მირზა სუბელიანის ფარული ჩანაწერების" საქმეზე გუშინ, 16 ოქტომბერს გამოძიების ფარგლებში მოპოვებული ახალი აუდიოჩანაწერი გაავრცელა. პროკურატურის ცნობით, სასჯელაღსრულებით დაწესებულებაში კანონდარღვევით სულ სამი ჩანაწერი განხორციელდა.