პაკისტანის ქალაქ კასურში ექვსი წლის გოგოს, ზაინაბ ანსარის გაუპატიურებისა და მკვლელობისთვის კაცი სიკვდილით დასაჯეს. როგორც BBC წერს, იმრან ალი, რომელიც მას შემდეგ დააკავეს, რაც გოგოს ცხედარი ნაგავსაყრელზე იპოვეს, ოთხშაბათს, 16 ოქტომბერს ჩამოახრჩეს. სიკვდილით დასჯას ესწრებოდნენ ზაინაბის მამა და ახლობლები.

მას შემდეგ, რაც იმრან ალი ზაინაბის მკვლელობაში სცნეს დამნაშავედ და სიკვდილი მიუსაჯეს, ის კიდევ ექვს გოგოზე ძალადობაში სცნეს დამნაშავედ.

ზაინაბის მკვლელობამ პაკისტანში მოსახლეობის საპროტესტო აქციები გამოიწვია. საზოგადოება დანაშაულის ერთ-ერთ მიზეზად პოლიციის არაკომპეტენტურობას ასახელებდა.

პაკისტანის ქალაქ კასურში ბოლო ორი წლის განმავლობაში უამრავი არასრულწლოვანი გოგო გაიტაცეს, გააუპატიურეს და მოკლეს. მშობლები ამბობდნენ, რომ შვილების სახლიდან გაშვების ეშინოდათ.

2018 წლის 4 იანვარს, ზაინაბის მშობლები საუდის არაბეთში სალოცავად იყვნენ წასულები, თავად ზაინაბი კი გაკვეთილზე დასასწრებად მიდიოდა, როდესაც ის გაიტაცეს. მისმა ბიძამ გოგოს დაკარგვის შესახებ პოლიციაში მომდევნო დღეს განაცხადა.

გატაცებიდან 5 დღის შემდეგ, ზაინაბ ანსარის გვამი პოლიციამ კასურში, მის სახლთან ახლოს არსებულ ნაგავსაყრელზე აღმოაჩინა. იმრან ალი ზაინაბის მეზობლად ცხოვრობდა და პოლიციამ ის 23 იანვარს დააკავა.