დამოუკიდებელი საპრეზიდენტო კანდიდატი, ბესარიონ თედიაშვილი აცხადებს, რომ პრეზიდენტობა ცვლილებების მოსატანად სურს. საზოგადოებრივი მაუწყებლის ეთერში საპრეზიდენტო დებატებზე თედიაშვილმა განმარტა, თუ რატომ გადაწყვიტა არჩევნებში ჩართვა.

"მეც როგორც ყველა მოქალაქეს მქონდა ჩემი აზრი და ვიჯექით, ვლაპარაკობდით. იქ სუფრაზე იყო თუ სამზარეულოში, ვიძახოდი ეს რატო კეთდება ასე, ბოლოს მივიღე გადაწყვეტილება, რომ თუ ამაზე ასე გეშლება ნერვები ადექი და იმოქმედე. ახლა მე რასაც ვაკეთებ, ვმოქმედებ", — განაცხადა კანდიდატმა.

თედიაშვილის თქმით, არ აშინებს გამოუცდელობა და ის, რომ პოლიტიკასთან შეხება არ ჰქონია. ამის მაგალითად მან ამერიკის შეერთებული შტატების პრეზიდენტი, დონალდ ტრამპი მოიყვანა.

"ეს არის მითი, რომ აუცილებლად პოლიტიკური წარსული და გამოცდილება უნდა გქონდეს, რომ რამის გამკეთებელი იყო ამ ქვეყანაზე. მე ვფიქრობ, რომ რამის გამკეთებელი უნდა იყო ქვეყანაზე პირველ რიგში, რომ მიიღო პოლიტიკური გამოცდილება", — განაცხადა თედიაშვილმა.

2018 წლის საპრეზიდენტო არჩევნებზე 25 კანდიდატია დარეგისტრირებული.