ფრაქცია ქართული ოცნების ყოფილი და ამჟამად დამოუკიდებელი დეპუტატი, დავით ჭიჭინაძე ფრაქცია პატრიოტებში წევრიანდება. აღნიშნული ინფორმაცია თავდაპირველად საზოგადოებრივმა მაუწყებელმა გაავრცელა, ხოლო On.ge-ს ფრაქცია პატრიოტების პრესსამსახურში დაუდასტურეს.

დავით ჭიჭინაძის განმარტებით, პატრიოტებში გაწევრიანების მიზეზი ირმა ინაშვილისთვის ფრაქციის შენარჩუნებაა, რომელიც ნატო ჩხეიძის პარტიიდან წამოსვლის შემდეგ დაიშალა.

პატრიოტთა ალიანსის ყოფილმა დეპუტატმა ნატო ჩხეიძემ პარტია პროტესტის ნიშნად დატოვა. მისი წასვლის შემდეგ ფრაქციაში 5 დეპუტატი დარჩა. პარლამენტის რეგლამენტის მიხედვით, ფრაქციას პარლამენტში მინიმუმ 6 წევრი უნდა ჰყავდეს.

დეპუტატი დავით ჭიჭინაძე ქართული ოცნებიდან გარიცხეს. შესაბამისი გადაწყვეტილება პარტიის სამდივნომ მიიღო. ოფიციალური განცხადებაში ნათქვამია, რომ დავით ჭიჭინაძის პარტიიდან გარიცხვის მიზეზი გახდა მისი არაერთი საჯარო განცხადება, რომლითაც მან შეურაცხყოფა მიაყენა პოლიტიკური გუნდის წევრებს და ზიანი მიაყენა პარტიის იმიჯსა და ინტერესებს. უმრავლესობის რიგები დეპუტატმა სექტემბერში დატოვა.