მას შემდეგ, რაც ლადო ბედუკაძემ თავისი Facebook გვერდის მეშვეობით გაავრცელა ინფორმაცია, რომ მას სახელმწიფო დაცვა მოუხსნეს, On.ge-ს პროკურატურას დაუკავშირდა იმისთვის, რომ გაერკვია, რამდენად შეესაბამებოდა აღნიშნული სიმართლეს. როგორც უწყებაში განგვიცხადეს, ასეთი ინფორმაცია საჯარო არ არის:

"საქართველოს სისხლის სამართლის საპროცესო კანონმდებლობის თანახმად, დაცვის სპეციალური ღონისძიების გამოყენების შესახებ გადაწყვეტილება არ არის საჯარო და აქიდან გამომდინარე, კომენტარს ვერ გავაკეთებთ".

ლადო ბედუკაძე აცხადებს, რომ გუშინ მას სახელმწიფო დაცვა მოუხსნეს. მისი თქმით, აღნიშნულ გადაწყვეტილებას პოლიტიკური სარჩული აქვს და ის ამაზე პასუხიმგებლობას საქართველოს მთავარ პროკურორს, ირაკლი შოთაძეს აკისრებს.

ლადო ბედუკაძე ე.წ. ციხის კადრების ავტორია. 3 წლის წინ ის მოწმეთა დაცვის პროგრამაში ჩასვეს და საპროცესო შეთანხმების გაფორმების შემდეგ, სახელმწიფო დაცვა დაუნიშნეს.

ბედუკაძე ასევე არის პოლიტიკური გაერთიანება - ცენტრისტების ერთ-ერთი ლიდერი. მისი პარტია ამომრჩეველს რუსულ პენსიებს, ორმაგ მოქალაქეობასა და ქვეყანაში რუსული ბაზების შემოყვანას სთავაზობდა, თუმცა დღეს ცესკომ ის რეგისტრაციიდან მოხსნა და განმარტა, რომ ცენტრისტების ხელმძღვანელი პირის უფლება-მოსილებას არ გააჩნია იურიდიული ძალა.