ლეიბორისტული პარტიის საპრეზიდენტო კანდიდატმა, შალვა ნათელაშვილმა საგანგებო ბრიფინგი გამართა, რომელზეც ქართული ოცნების მიერ მხარდაჭერილი საპრეზიდენტო კანდიდატის, სალომე ზურაბიშვილის ამომრჩეველთან შეხვედრა განიხილა.

ნათელაშვილმა რუსთაველის თეატრში გამართულ შეხვედრას "სამარცხვინო თავყრილობა" უწოდა და შეურაცხმყოფლად მოიხსენია იქ მყოფი რეჟისორები და მსახიობები, მათი წინაპრები ქვეყნის ღალატში დაადანაშაულა.

ნათელაშვილი ამომრჩეველს დაპირდა, რომ მისი გაპრეზიდენტების შემთხვევაში ქართული ინტელიგენციის წარმომადგენლები სამთავრობო დაწესებულებებში ვერ დასაქმდებიან.

"ჩემი გაპრეზიდენტების შემდეგ თქვენი გრიალი დამთავრებულია. თქვენ არავინ აღარ მოგისმენთ მთავრობაში, თქვენ ვერავის ვეღარ დაურეკავთ და თქვენი დახმარება არავის დასჭირდება", — განაცხადა ნათელაშვილმა.

ნათელაშვილმა ასევე აღნიშნა, რომ ინტელიგენტი და ხელოვანი ადამიანი მაშინ არის როდესაც მოქალაქეების გვერდით დგას და არ მოქმედებს ფინანსური ინტერესებით.

სალომე ზურაბიშვილი ამომრჩეველს 5 ოქტომბერს რუსთაველის თეატრში შეხვდა. შეხვედრას ესწრებოდნენ ქართული კინოსა და თეატრის ცნობილი რეჟისორები და მსახიობები. შეხვედრას ესწრებოდნენ ქართული ოცნების წევრებიც.