პრემიერ-მინისტრი მამუკა ბახტაძე სოფელ ახალი ხურვალეთიდან მაია ოთინაშვილის გატაცების ფაქტს ეხმაურება და აცხადებს, რომ მის გასათავისუფლებლად შესაბამისი უწყებები 24-საათიან რეჟიმში იყენებენ მათ ხელთ არსებულ ყველა მექანიზმსა და კომუნიკაციის არხს.

პრემიერის განცხადებით, ისინი ჯერ კიდევ დილით ვარაუდობდნენ, რომ რამდენიმე საათში გაირკვეოდა მისი გათავისუფლების საკითხი, თუმცა, მისივე თქმით, ეს ამ დრომდე ვერ მოხერხდა.

"უკანონოდ დაკავებული ჩვენი მოქალაქის გასათავისუფლებლად, გააქტიურებულია ცხელი ხაზი და ინფორმირებულნი არიან საერთაშორისო ორგანიზაციები. მე დავავალე საგარეო საქმეთა მინისტრს, დღესვე პირადად შეხვდეს საერთაშორისო ორგანიზაციებისა და დიპლომატიური კორპუსის წარმომადგენლებს და დეტალური ინფორმაცია მიაწოდოს მათ მომხდართან დაკავშირებით. უნდა გავაკეთოთ მაქსიმუმი იმისთვის, რომ ჩვენი მოქალაქე ოჯახს, თავის სამ მცირეწლოვან შვილს დროულად დაუბრუნდეს", — ნათქვამია პრემიერის განცხადებაში.

მაია ოთინაშვილი რუსმა სამხედროებმა საოკუპაციო ხაზთან 29 სექტემბერს დააკავეს. ცხინვალიდან მიღებული ბოლო ინფორმაციით, მაია ოთინაშვილს 10-დღიანი ე.წ. წინასწარი პატიმრობა აქვს შეფარდებული.

ომბუდსმენის ცნობით, ოჯახის ინფორმაციით, დაკავებული ქალი ნაცემია. მათი განცხადებით, ის ქარძმანში განლაგებულ რუსულ ბაზაზე სცემეს. ნინო ლომჯარია ასევე ოჯახის ინფორმაციაზე დაყრდნობით წერს, რომ, დაკავებული არ მოუნახულებია არც ერთ დამოუკიდებელ დამკვირვებელს.

მაია ოთინაშვილის საქმე

სახალხო დამცველის ნინო ლომჯარიას ინფორმაციით, თვითმხილველებმა დაინახეს, რომ მოქალაქე შეიარაღებულმა, ნიღბიანმა პირებმა გაიტაცეს საქართველოს კონტროლირებადი ტერიტორიიდან, მავთულხლართიდან დაახლოებით 50 მეტრის მანძილზე. ომბუდსმენის ცნობით, მაია ოთინაშვილს "ბრალად ედება" თანხის სანაცვლოდ მოქალაქეების ე.წ. საზღვრის უკანონო გადაკვეთაში დახმარება.

მაია ოთინაშვილი მეუღლესთან და სამ შვილთან ერთად გორში ცხოვრობს. სახალხო დამცველის ინფორმაციით, რამდენიმე დღის განმავლობაში, ოჯახის წევრებს არ ჰქონდათ საკმარისი ინფორმაცია დაკავებულის ზოგადი მდგომარეობის და უსაფრთხოების შესახებ.

ხურვალეთი გამყოფი ხაზის სოფლებს შორის ერთ-ერთი ყველაზე მეტად დაზარალებული სოფელია. მავთულხლართების გავლების შედეგად სოფლის 36 ჰა სასოფლო სამეურნეო მიწა, საძოვრები, სასაფლაო და რამდენიმე სახლი ოკუპირებულ ნაწილზე მოექცა, სარწყავი წყალი 2008 წლიდან გადაკეტილი აქვს დე ფაქტო ხელისუფლებას, ადამიანების გატაცებები და დაკავებები თითქმის ჩვეულ მოვლენად იქცა.

მაია ოთინაშვილი ხურვალეთიდან უკვე მე-5 დაკავებული ქალია.