ომეგა ჯგუფის საქმეზე სპორტის ყოფილი მინისტრი, ლევან ყიფიანი სასამართლოში, სავარაუდოდ, 3 ოქტომბერს გამოიკითხება. როგორც პროკურატურის პრესსამსახურმა On.ge-ს უთხრა, ყიფიანი პროკურატურაში მოწმის სტატუსით იყო დაბარებული, თუმცა მან ჩვენების მიცემაზე უარი თქვა და სასამართლოში გამოკითხვა მოითხოვა.

ამავე საქმის ფარგლებში პროკურატურამ გამოკითხვაზე კიდევ ერთხელ დაიბარა ომეგა ჯგუფის დამფუძნებელი ზაზა ოქუაშვილი.

საქართველოს პროკურატურამ მედიასაშუალებებში ომეგა ჯგუფთან დაკავშირებით გავრცელებულ აუდიოჩანაწერებზე საქმეზე გამოძიება 12 სექტემბერს დაიწყო.

აუდიოჩანაწერში, რომელიც 10 სექტემბერს რუსთავი 2-მა გაავრცელა, სავარაუდოდ, სპორტის ყოფილი მინისტრი ლევან ყიფიანი და ომეგა ჯგუფის დამფუძნებელ ზაზა ოქუაშვილს ბიძინა ივანიშვილის დეიდაშვილთან, უჩა მამაცაშვილთან საუბრის დეტალებს უყვება. ჩანაწერში ისმის, რომ მამაცაშვილი ომეგა ჯგუფის პრობლემების მოსაგვარებლად, მთავრობასთან მოლაპარაკებას აწარმოებდა და ამ თემაზე პრემიერთან შეხვედრასაც გეგმავდა.

ჩანაწერის მიხედვით, ომეგა ჯგუფის მფლობელს ბიძინა ივანიშვილის დეიდაშვილი უჩა მამაცაშვილი მთავრობასთან პრობლემების მოგვარებაში ორ მილიონ დოლარს სთხოვდა. ორი კვირის შემდეგ, პროკურატურამ ომეგა ჯგუფის საქმეს კიდევ რამდენიმე ჩანაწერი დაურთო.

რამდენიმე დღის წინ რუსთავი 2-ის ეთერში კიდევ ერთი აუდიოჩანაწერი გავრცელდა, რომელშიც, სავარაუდოდ, ყოფილი პროკურორი ოთარ ფარცხალაძე სპორტის ყოფილ მინისტრს ლევან ყიფიანს გაუპატიურებით ემუქრებოდა. რუსთავი 2-ის ცნობით, ფარცხალაძე ყიფიანს ფიზიკურად ერთ-ერთ სარდაფში გაუსწორდა.