ქართული ოცნების მიერ მხარდაჭერილ საპრეზიდენტო კანდიდატს, სალომე ზურაბიშვილს სექტემბერში 104 შემომწირველიდან 84-მა 30 თეთრი გადაურიცხა. ამის შესახებ ინფორმაცია აუდიტის სამსახურის ვებგვერდზეა გამოქვეყნებული.

საქართველოს მოქალაქეებმა კამპანია #ნუყიდისაქართველოს მას შემდეგ დაიწყეს, რაც ზურაბიშვილმა 2008 წლის აგვისტოს ომის დროს სამხედრო მოქმედებების დაწყებაში საქართველო დაადანაშაულა. მოქალაქეები ზურაბიშვილის საარჩევნო კამპანიისთვის 30 თეთრს ურიცხავდნენ და დანიშნულებაში უთითებდნენ "30 ვერცხლის ნაცვლად".

სალომე ზურაბიშვილმა მიმდინარე წლის სექტემბერში შემოწირულობის სახით სულ 332 245 ლარი მიიღო.