ლეგენდარული მსახიობის, მერილ სტრიპისა და მისი ქმრის, დონ გამერის ქორწინება არათუ ჰოლივუდში, არამედ მთელს მსოფლიოში სამაგალითოდ ითვლება.

თუმცა მათი სიყვარულის ისტორია არც თუ ისე ბედნიერად დაიწყო.

სტრიპის პირველი სიყვარული მსახიობი ჯონ კაზალე მერილზე 13 წლით უფროსი იყო. წყვილმა ერთმანეთი ჯერ კიდევ მაშინ გაიცნო, როცა სტრიპის სახელი არაფრისმთქმელი იყო.

ურთიერთობის 2 წლის თავზე კაზალე სიმსივნის დიაგნოზით გარდაიცვალა. მას შემდეგ, რაც მამაკაცს დიაგნოზი დაუსვეს, სტრიპმა შვებულება აიღო, რათა საყვარელ ადამიანთან ერთად ყოფილიყო. კაზალე 1978 წელს გარდაიცვალა. როგორც ამბობენ, მერილ სტრიპი მასთან ბოლო წუთამდე იმყოფებოდა და ამ ამბის შემდეგ ხანგრძლივი დეპრესია ჰქონდა. როგორც სხვადასხვა გამოცემები წერდნენ, ამ ტრაგიკულმა ამბავმა მერილზე ძალიან დიდი გავლენა მოახდინა და მეტიც, ის ამ თემაზე არასდროს საუბრობს.

ჯონის გარდაცვალების შემდეგ სტრიპის დროებითი საცხოვრებელი ძმის მეგობარის სახელოსნო გახდა. დონ გამერი მერილისთვის კარგი მეგობარი აღმოჩნდა, ისმენდა მის ამბებს და განცდებს, რომელიც პირველი სიყვარულის ტრაგიკულად დამთავარების შემდეგ გამოჰყვა. ცოტა ხანში წყვილი მიხვდა, რომ მათ ერთმანეთი შეუყვარდათ და საცხოვრებლადაც ერთად გადავიდნენ.

40 წლის წინ დაწყებული სიყვარულის ისტორია კი დღემდე გრძელდება და ისინი ჰოლივუდის ერთ-ერთ ყველაზე მყარ ოჯახად ითვლებიან.