ადამიანის უფლებების სწავლებისა და მონიტორინგის ცენტრის (EMC) განცხადებით, სააპელაციო სასამართლომ 12 მაისს, ღამის კლუბებში ჩატარებული სპეცოპერაციის დროს დაკავებულ ბექა წიქარიშვილის მიმართ ადმინისტრაციული სამართალდარღვევის საქმის წარმოება შეწყვიტა.

EMC-ის ცნობით, სასამართლოს გადაწყვეტილების სამოტივაციო ნაწილი და არგუმენტაცია, გადაწყვეტილების ჩაბარების შემდგომ გახდება ცნობილი.

თბილისის საქალაქო სასამართლომ, 31 ივლისის დადგენილებით, ბექა წიქარიშვილი სამართალდამრღვევად მიიჩნია და წვრილმან ხულიგნობად განმარტა ბექა წიქარიშვილის მიერ საზოგადოებრივი თავშეყრის ადგილას მეგაფონით მოწოდება, რომ მშვიდობიანი შეკრება პარლამენტის მიმდებარე ტერიტორიისკენ მსვლელობით გაგრძელებულიყო.

სასამართლომ დადგენილებაში მიუთითა, რომ "ტერიტორია, სადაც ბექა წიქარიშვილი დააკავეს, წარმოადგენს საზოგადოებრივი თავშეყრის ადგილს, აღნიშნული ქმედება განხორციელდა ღამის საათებში, შესაბამისად დაირღვა მოქალაქეების სიმშვიდე".