პარლამენტის თავმჯდომარეს, ირაკლი კობახიძეს მიაჩნია, რომ თუ კანაფის კულტივაციის ინიციატივა ზიანის მომტანი არ არის და სიღარიბის აღმოფხვრას შეუწყობს ხელს, მასზე უარი არ უნდა ითქვას.

"ზუსტად ამიტომ არ ვამბობთ უარს, რომ ამაზე გვინდა საზოგადოების ინფორმირება, ეკლესიის წარმომადგენლების ინფორმირება, რომ, ერთი მხრივ, არ არის ზიანი, და მეორე მხრივ, არის დიდი სარგებელი. თუ ამაში ყველა ერთად დავრწმუნდებით, ამ შემთხვევაში, მივიღებთ გადაწყვეტილებას განხილვის გაგრძელების თაობაზე", — განაცხადა კობახიძემ.

ირაკლი კობახიძის თქმით, არსებობს დეტალური გათვლები, რაც მიანიშნებს, რომ შესაძლოა, ცვლილებებმა დიდი სარგებელი მოიტანოს.

"ეს იყო ჩვენი მთავარი არგუმენტი. საუბარია ძალიან დიდ სარგებელზე. ჩვენ ვხედავთ, რომ არის სერიოზული პრობლემები გამომდინარე იმ ეკონომიკური მონაცემებიდან, რომელიც არსებობს..." — აღნიშნა კობახიძემ.

რაც შეეხება საპატრიარქოში გამართულ შეხვედრას პარლამენტის თავმჯდომარემ აღნიშნა, რომ ინიციატივასთან დაკავშირებით, საპატრიარქოს წარმომადგენლების საქმის კურსში ჩაყენების სურვილი მმართველმა გუნდმა გამოხატა:

"ვითხოვეთ ჩვენ კონსულტაციები ამ საკითხთან დაკავშირებით და შედგება ასეთი კონსულტაციები აუცილებლად საპატრიარქოს წარმომადგენლებთან. ჩვენთვის მთავარია, რომ საზოგადოების ინფორმირება მოვახდინოთ იმასთან დაკავშირებით, რომ არაფერს ცუდს ეს კანონპროექტი არ ითვალისწინებდა".

მარიხუანის შესახებ კანონი

მარიხუანის კულტივაცია-ექსპორთან დაკავშირებულმა კანონპროექტმა საპატრიარქოში დიდი უკმაყოფილება გამოიწვია. ამის გამო პარლამენტმა კანონპროექტის განხილვის გადავადება გადაწყვიტა.

სასულიერო პირების ნაწილმა, თბილისის საკრებულოსთან პარაკლისი აღავლინა და შინაგან საქმეთა სამინისტროს მიერ კანაფის კონტროლის შესახებ კანონპროექტი კიდევ ერთხელ გააკრიტიკა.

პარაკლისის დასრულების შემდეგ, მრევლს მამა შალვა კეკელიამ მიმართა. მისი თქმით, ეკლესია ორ გადაწყვეტილებას აპროტესტებს: პირველი, საკონსტიტუციო სასამართლოს მიერ მარიხუანის მოხმარების ლეგალიზებას ეხება, ხოლო მეორე, კანაფის სამედიცინო მიზნებით კულტივაციასა და ექსპორტს.

მას შემდეგ, რაც გასაჯაროვდა, რომ შინაგან საქმეთა სამინისტრო კანაფის ექსპორტზე მუშაობდა საქართველოს საპატრიარქომ რადიკალური განცხადებები გააკეთა. ისინი შეეწინააღმდეგნენ ხელისუფლებას და განაცხადეს, რომ მზად არიან აჩვენონ საკუთარი ძალა.

სასულიერო პირებმა აქამდეც გამართეს საპროტესტო აქცია. მათ გააპროტესტეს მარიხუანის ლეგალური მოხმარების შესახებ საკონსტიტუციოს გადაწყვეტილება და ბათუმში, გამართულ აქციაზე საკონსტიტუციო სასამართლოს გაუქმება მოითხოვეს. პატრიარქმა კი განაცხადა, რომ ნარკოტიკების მოხმარებაზე ნების დართვა არის ერის მტრობა.