იუსტიციის უმაღლესი საბჭოს არამოსამართლე წევრი, ნაზი ჯანეზაშვილი საბჭოს მდივანსა და მოსამართლეს, გიორგი მიქაუტაძეს გავლენების გამოყენებაში ადანაშაულებს.

ჯანეზაშვილის თქმით, გიორგი მიქაუტაძეს მოსამართლეობის ათწლიანი ვადა 2022 წელს ეწურება და მოსამართლედ უვადოდ გამწესებისთვის თავისი გავლენებისა და სტატუსის გამოყენებას ცდილობს, რის გამოც მოსამართლეთა მიმდინარე კონკურსში იღებს მონაწილეობას.

"აქედან გამომდინარე, ცხადი არის, რომ ის არ ელოდება აღნიშნული ვადის ამოწურვას, ცდილობს, რომ გამოიყენოს მისი ესოდენ გავლენიანი სტატუსი და მდგომარეობა", — განაცხადა ჯანეზაშვილმა.

არამოსამართლე წევრი, ასევე, კახაბერ ხაჩიძისა და თამარ ხაჭაპურიძის საქმეს შეეხო, სადაც გიორგი მიქაუტაძე დაზარალებულის სტატუსით ფიგურირებდა. საქმე ეხება 2016 წელს გონიოს პლაჟზე მომხდარ ინციდენტს.

თამარ ხაჭაპურიძისა და კახაბერ ხაჩიძის თქმით, გიორგი მიქაუტაძემ მათი არასრულწლოვანი შვილი სცემა და გამოძიება ცემის ბრალდებით 26 აგვისტოს დაიწყო. იმავე დღეს საქმეს კვალიფიკაცია შეეცვალა და მოსამართლის მიმართ სოცოცხლის მოსპობისა და ჯანმრთელობის დაზიანების მუქარის მუხლით გაგრძელდა, ბავშვის მშობლები კი იმავე დღეს დააპატიმრეს. გიორგი მიქაუტაძის თქმით, მას სიცოცხლის მოსპობის მუქარით ორგანიზებულად დაემუქრნენ.

2018 წლის ივლისში ხელვაჩაურის რაიონული სასამართლოს მოსამართლემ, ხვიჩა კიკილაშვილმა მშობლების მიმართ გამამტყუნებელი განაჩენი გამოიტანა და ოთხი ათასი ლარით დააჯარიმა.

როგორც ჯანეზაშვილი ამბობს, ამ საქმის მოსამართლე 2018 წლის თებერვალში უვადო მოსამართლედ გამწესდა და ხვიჩა კიკილიშვილის გასაუბრებებს ესწრებოდა გიორგი მიქაუტაძე. მან, ასევე, დაამატა, რომ გამამტყუნებელი განაჩენის შემდეგ თამარ ხაჭაპურიძემ და კახაბერ ხაჩიძემ აგვისტოში დიდ ბრიტანეთში ლტოლვილის სტატუსი მიიღეს.

იუსტიციის უმაღლესი საბჭოს არამოსამართლე წევრის ბრალდებებს უარყოფს და ცილისმწამებლურს უწოდებს გიორგი მიქაუტაძე. მისი თქმით, ხვიჩა კიკილაშვილის საქმეზე ის აცილებული იყო და უვადოდ გამწესებაში მონაწილეობა არ მიუღია. მიქაუტაძე, ასევე, უარყოფს რაიმე კავშირს ლტოლვილის სტატუსის მიღებასა და გამამტყუნებელ განაჩენს შორის.

რაც შეეხება მის უვადო მოსამართლედ დანიშვნას, მიქაუტაძე განმარტავს, რომ საკუთარ კარიერაზე წინასწარ ზრუნავს.

"ეს ვადა ნელ-ნელა იწურება. მაქვს სურვილი, რომ გავაგრძელო ჩემი კარიერა სასამართლო სისტემაში. მაქვს იმის პრეტენზია, რომ ვიყო უვადოდ გამწესებული", — განაცხადა მიქაუტაძემ.