ევანგელურ-ბაპტისტური ეკლესიის ეპისკოპოსი, რუსუდან გოცირიძე აცხადებს, რომ რელიგიური პირის მოღვაწეობა შემოსაზღვრული არ უნდა იყოს მხოლოდ ღმერთზე საუბრით და ტაძარში ყოფნით. მისი თქმით, სასულიერო პირი არ უნდა იყოს გამიჯნული საზოგადოებისთვის მნიშვნელოვანი მოვლენებისგან, თუმცა ამბიონს პოლიტიკური პარტიების მხარდასაჭერად არ უნდა იყენებდეს. ამის შესახებ მან ინგა გრიგოლიას ტოქ-შოუ რეაქციაში ისაუბრა.

"სახელმწიფო და ეკლესია უნდა იყოს გამიჯნული. გამიჯვნა ნიშნავს, რომ ისინი არ უნდა ინაწილებდნენ ძალაუფლებას, არც რელიგიური თემი და არც სახელმწიფო. თუმცა, მეორე მხივ, ეს არ ნიშნავს, როგორც, მაგალითად, რადიკალური სეკულარისტები ამბობენ, რომ რელიგია არის ვიწრო პირადი ინტიმური სივრცის მოვლენა და რელიგია არ უნდა გამოდიოდეს თავისი ტაძრის საზღვრებიდან", — განაცხადა გოცირიძემ.

გოცირიძის თქმით, განსხვავებაა ვიწრო პოლიტიკური ინტერესებში გზის გაკვალვასა და სახელმწიფოებრივი მნიშვნელობის საკითხებზე განცხადებების გაკეთებას შორის. მისივე თქმით, პოლიტიკურ თამაშში თანაბრად არის ჩართული სახელმწიფოც და ეკლესიაც.

ეკლესია და სალომე ზურაბიშვილი

მას შემდეგ, რაც მეუფე პეტრემ და მეუფე იაკობმა მმართველი პარტიის მხარდაჭერილი კანდიატის, სალომე ზურაბიშვილის შესახებ ისაუბრეს, საქართველოს საპატრიარქომ განცხადება გაავრცელა. მართლმადიდებელი ეკლესიის პატრიარქმა, ილია მეორემ მოუწოდა მღვდლებს თავი შეეკავებინათ პოლიტიკოსების არაკორექტულად მოხსენიებისგან.

თავდაპირველად ზურაბიშვილმა განაცხადა, რომ თავს უფლებას არ მისცემდა მეუფეების განცხადებები შეეფასებინა. მოგვიანებით კი აღნიშნა — "ეკლესიის ამ დონის ფიგურები ერევიან იმაში, რაც ნამდვილად არ არის მათი საქმე".

ეკლესია კანაფის წარმოებისა და ხელისუფლების წინააღმდეგ

სასულიერო პირები და საპატრიარქო აქტიურად იყვნენ ჩართული მთავრობის ახალი კანონპროექტის კანაფის სამედიცინო მიზნით წარმოების წინააღმდეგ ბრძოლაშიც. მას შემდეგ, რაც გასაჯაროვდა, რომ შინაგან საქმეთა სამინისტრო კანაფის ექსპორტზე მუშაობდა საქართველოს საპატრიარქომ რადიკალური განცხადებები გააკეთა. ისინი შეეწინააღმდეგნენ ხელისუფლებას და განაცხადეს, რომ მზად არიან აჩვენონ საკუთარი ძალა.

საპროტესტო პარაკლისებისა და პატრიარქის ქადაგების შემდეგ, კანონპროექტის განხილვაში საპატრიარქოც ჩაერთო. პარლამენტის თავმჯდომარემ, ირაკლი კობახიძემ კი განაცხადა, რომ საპარიარქოს არაფრის დათმობა არ მოუწევს. პარლამენტმა კი კანონპროექტის განხილვა გადაავადა.