საქართველოს პარლამენტის თავმჯდომარემ, ირაკლი კობახიძემ განაცხადა, რომ საპატრიარქოს არაფრის დათმობა არ მოუწევს. ჟურნალისტის კითხვაზე — რას ფიქრობს მთავრობა სასულიერო პირების განცხადებაზე, რომელიც ამბობენ რომ ეკლესია არ დათმობს და არ დაუშვებს ნარკოტიკების რეალიზაციას — კობახიძე პასუხობს:

"არავითარ შემთხვევაში არ არის აქ საუბარი იმაზე, რომ რაღაც უნდა დათმოს ეკლესიამ. დათმობაზე შეიძლება იყოს საუბარი იმ შემთხვევაში თუ ჩვენ ვიღებთ გადაწყვეტილებას ნარკოტიკების წარმოება-რეალიზაციაზე. ამ გადაწყვეტილებას პარლამენტი არცერთ შემთხვევაში არ მიიღებს, ამაზე არ არის საუბარი კანონპროექტში და აქედან გამომდინარე საპატრიარქოს არ მოუწევს არაფრის დათმობა".

კობახიძემ განაცხადა, რომ კანაფის კულტივაციისა და რეალიზაციის კანონპროექტს პარლამენტი ჯერ არ განიხილავს, რადგან "არსად ეჩქარებათ" და საჭიროა საზოგადოების, მათ შორის ეკლესიისათვის სწორი ინფორმაციის მიწოდება. მისივე თქმით, უკვე ჰქონდათ კონსულტაციები საპატრიარქოს წარმომადგენლებთან სხვადასხვა დონეზე და კონსულტაციები გაგრძელდება ყველა დაინტერესებულ მხარესთან.

კობახიძემ განაცხადა, რომ მომდევნო კვირიდან პარლამენტში დაიწყება მარიხუანის მოხმარების რეგლამენტაციის განხილვა და რეგლამენტაცია იქნება მკაცრი. მისი თქმით, დაჩქარებული განხილვა შინაგან საქმეთა სამინისტროს თხოვნაა, რადგან საკონსტიტუციო სასამართლოს გადაწყვეტილებიდან გამომდინარე არსებობს ვაკუუმი და საზოგადოება უნდა იყოს ინფორმირებული.

კობახიძემ ეს განცხადება სამების ტაძარში ქადაგების დაწყებამდე გაავრცელა. მას შემდეგ, რაც გასაჯაროვდა, რომ შინაგან საქმეთა სამინისტრო კანაფის ექსპორტზე მუშაობდა საქართველოს საპატრიარქომ რადიკალური განცხადებები გააკეთა. ისინი შეეწინააღმდეგნენ ხელისუფლებას და განაცხადეს, რომ მზად არიან აჩვენონ საკუთარი ძალა.