მოემზადეთ ნოსტალგიის შეტევისთვის: სონი აპირებს ლეგენდარული კონსოლის ახალი ვერსია, Playstation Classic გამოუშვას. პროდუქტის პრეზენტაცია 3 დეკემბერს შედგება და მისი ფასი $99.99 იქნება.

განახლებული ფლეისთეიშენი ორიგინალურთან შედარებით 45%-ით პატარაა და მას წინასწარ ჩაწერილი 20 ვიდეოთამაში მოჰყვება. მათ შორისაა Final Fantasy VII, Tekken 3 და Wild Arms. როგორც კომპანია აცხადებს, ჩამონათვალში ყველა ის თამაში შეიყვანეს, რომელიც ფანებს განსაკუთრებით უყვარდათ და რომელთაც ვიდეოთამაშების ჟანრები განსაზღვრეს.

ფლეისთეიშენი კლასიკური შეფუთვით და თავდაპირველი კონტროლერებით გაიყიდება. რაც შეეხება გრაფიკას, ის ცოტა უფრო დახვეწილი იქნება, ვიდრე 90-იანებიდან გვახსოვს.

ფლეისთეიშენის პირველი ვერსიის გამოსვლიდან მალე 25 წელი გავა. პროდუქტმა გამოსვლისთანავე უდიდესი კომერციული წარმატება მოუტანა კომპანიას. პირველ ექვს თვეში მხოლოდ იაპონიაში 2 მილიონზე მეტი ეგზემპლარი გაიყიდა, რითაც სონიმ სფეროს ძველი ლიდერი, სეგა უკან მოიტოვა.

სონი პირველი კომპანია არაა, რომელიც აქცენტს საკულტო პროდუქტებზე აკეთებს. 2016 წელს ნინტენდომ NES Classic-ის ბაზარზე დაბრუნებით ნამდვილი რეტრო-ტალღა წამოიწყო. კომპანიამ მხოლოდ 5 თვეში 2 მილიონზე მეტი კონსოლი გაყიდა.

ამავე თემაზე: 16 ვიდეოთამაში 90-იანებიდან, რომლებიც არ გახსოვდათ