სკოლებში ახალი სასწავლო წელი, ბაგა-ბაღებში კი სააღმზრდელო პროცესი დაიწყო. საქართველოს განათლების, სპორტის, კულტურისა და მეცნიერების სამინისტროს ინფორმაციით, საქართველოს მასშტაბით საჯარო სკოლების პირველ კლასში 50 232, კერძოში კი - 5 892 მოსწავლე დარეგისტრირდა.

2018-2019 სასწავლო წლის დაწყება საქართველოს პრეზიდენტმა, გიორგი მარგველაშვილმა 51-ე სკოლიდან მიულოცა.

პრეზიდენტმა 51-ე სკოლის მოსწავლეებსა და პედაგოგებს მიმართა და აღნიშნა, რომ სასკოლო ცხოვრება საინტერესო წლებია, იმ ტრაგედიამ, კი რომელიც ამ სკოლაში განიცადეს, უფრო კეთილები უნდა გაგვხადოს და გაგვზარდოს.

"ისინი, ვინც ამთავრებენ წელს სკოლას, თქვენთან ერთად მინდა ვიყო და გითხრათ იმ ტკივილზე, რომლიც თქვენ განიცადეთ. ასეთმა ტკივილმა და ამ ტრაგედიამ ალბათ, ყველა უფრო კეთილი უნდა გაგვხადოს და გაგვზარდოს, რადგან ტკივილი და ტრაგედია გამოცდილებაა ადამიანისთვის და თუ ჩვენ შევძლებთ, რომ ეს ტკივილი გადავიტანოთ ერთმანეთის მიმართ სიყვარულში, ერთმანეთის მიმართ უფრო მეტ თანადგომაში, ვფიქრობ, უკეთეს მომავალს მივცემთ ჩვენს შვილებს", - განაცხადა გიორგი მარგველაშვილმა.

განათლების მინისტრმა, მიხეილ ბატიაშვილმა კი სასწავლო პროცესის დაწყება მოსწავლეებს 150-ე სკოლიდან მიულოცა.

სარეაბილიტაციო სამუშაოების გამო, 2018-2019 სასწავლო წლის დაწყება 1 კვირით გადაიდო 5 კერძო და 4 საჯარო სკოლაში.

ბაგა-ბაღებში სააღმზრდელო პროცესი 180 საბავშვო ბაღში განახლდა.