საქართველოს ყოფილი პრეზიდენტი, მიხეილ სააკაშვილი მარიხუანის სამედიცინო მიზნებისთვის კულტივაციის საკითხზე ქორეპისკოპოს იაკობის შეფასებას ეთანხმება. მან დღეს, 13 სექტემბერს ვიდეომიმართვა გაავრცელა, სადაც ამბობს, რომ შედეგად, საქართველო დაემსგავსება ავღანეთსა და კოლუმბიას:

"მე როცა მელაპარაკებიან ამერიკაზე, ბევრად უფრო ახლო მაგალითი გვაქვს ჩვენთვის - ეს არის ავღანეთი. ავღანეთი 70-იან წლებში იყო ძალიან წარმატებული ქვეყანა, განათლებული ხალხით, თანამედროვე ინფრასტრუქტურით, შადრევნებით, უჩადრო ქალებით, კარგად ჩაცმული და ა.შ. ავღანეთში 70-იან წლებში მასობრივად შემოვიდა ყაყაჩოს კულტურა და მთელი ქვეყანა დაჯდა და დაიწყო მოწევა. მე ნამყოფი ვარ ავღანეთში არაერთხელ და ეს არის ერთ-ერთი გაუბედურებული ქვეყანა მსოფლიოში. ჩვენ გვიმზადებენ არა კოლორადოს შტატობას, თუმცა კოლორადოს შტატშიც არ არის ყველაფერი კარგად, ჩვენ გვიმზადებენ ავღანეთს, ჩვენ გვიმზადებენ კოლუმბიას. ამ პირობებში, ჩვენ უნდა შევქმნათ წინააღმდეგობის ფრონტი, რათა არ დავუშვათ ჩვენი ერის გადაგვარება, გადაჯიშება. ეს, რასაც ჩვენ გვეუბნებიან ეს არ არის თავისუფლება, ნარკოტიკებს მოაქვს დანაშაული, კარტელს მოაქვს ხელისუფლების უზურპაცია, უკიდურესი გაღატაკება და გამოშტერება".

საქართველოში სამედიცინო მიზნით მარიხუანის წარმოება პატრიარქის ქორეპისკოპოსმა იაკობმაც გააკრიტიკა. მისი თქმით, მსგავსი ნაბიჯი ქვეყნისთვის საფრთხეებს შეიცავს.

"რა საფრთხეებს და რასაც კოლუმბიასა და ავღანეთში, იმ საფრთხეებს ვხედავ", — ამის შესახებ მეუფემ კონფერენციაზე "ნარკოპოლიტიკა საქართველოში – გამოწვევები და საერთაშორისო გამოცდილება" ისაუბრა.

საქართველოს შინაგან საქმეთა სამინისტრო სამთავრობო გუნდთან ერთად მუშაობს კანონპროექტზე, რომელიც მარიხუანისგან წარმოებული მედიკამენტების ექსპორტზე გატანას გულისხმობს.

გაიგეთ მეტი რას გულისხმობს მარიხუანის მოხმარებისა და კულტივაციის რეგულირების კანონპროექტი