"რატომ ვერ გავცემ პასუხს, რატომ არის სენსიტიური, ჩემს ყოფილ გელფრენდზე კითხვა კი არაა?" — ასე უპასუხა საქართველოს პრეზიდენტმა, გიორგი მარგველაშვილმა თბილისში გამართულ საერთაშორისო კონფერენციაზე დასმულ კითხვას ბიძინა ივანიშვილის შესახებ.

კონფერენციის მოდერატორი დაინტერესდა რამდენად დიდი პრობლემაა ერთი ადამიანის, ბიძინა ივანიშვილის დომინირება ქვეყანაში:

"ბატონო პრეზიდენტო, ძალიან საინტერესო ადამიანი ბრძანდებით, ერთი სახელია ბატონი ბიძინა ივანიშვილი, საქართველოს ბევრი მეგობარი შეწუხებულია, რომ ერთ ადამიანს უჭირავს ძალიან დიდი როლი ამ ქვეყნის ცხოვრებაში. მე ვიცი, რომ ეს კითხვა სენსიტიურია და რთულია ამ კითხვაზე პასუხის გაცემა იქნებ შეეცადოთ?".

გიორგი მარგველაშვილმა საპასუხოდ განაცხადა, რომ მისი პოლიტიკური ცხოვრების მთავარი ნაწილი ბიძინა ივანიშვილთან კონფრონტაცია იყო.

"ქართულ ოცნებას აქვს კარგი მიზეზი, რომ ვძულდე ამის გამო. სხვა მიზეზს ვერ ვხედავ, რატომ აღმიქვამენ ქვეყნის მტრად. ეს ნორმალურიც არის. ყველგან, ნებისმიერ ქვეყანაში პოლიტიკოსები ეძებენ მიზეზებს რატომ უნდა სძულდეთ ერთმანეთი. ქართულ ოცნებას კარგი მიზეზი ჰქონდა, იმიტომ რომ ბიძინას არ მოვწონდი. თავიდან რთული იყო, გამოწვევა იყო, შუაგზაზე და ახლა უკვე მოსაწყენია პრეზიდენტობის ბოლოს", — განაცხადა მარგველაშვილმა.

მან ბიძინა ივანიშვილს ძლიერი ადამიანი უწოდა, ხოლო იმ პირებს, რომლებიც მისივე თქმით, ივანიშვილის სკამს უკან იმალებიან, სუსტი.

"მე ვფიქრობ, რომ სუსტი ადამიანები, სუსტი პოლიტიკოსები არიან პრობლემა, რომლებიც იმალებიან ძლიერი ლიდერის უკან, რომლებიც ყოველთვის ვიღაცას რაღაცას აბრალებენ. მე მწამს, რომ ჩვენ ნებისმიერი ძლიერი ადამიანის გავლენისთვის პასუხი უნდა ვაგოთ, მაგრამ ის ადამიანები, რომლებიც ამასთან კომფორტში არიან უფრო ცუდია. მირჩევნია იყვნენ ძლიერი და მდიდარი ადამიანები, ვიდრე სუსტი პრემიერ-მინისტრი, სუსტი მინისტრი, რომელიც ძლიერი ლიდერის სკამს უკან იმალება", — განაცხადა მარგველაშვილმა.