პრემიერ-მინისტრმა, მამუკა ბახტაძემ მთავრობის სხდომის წინ, ბრიფინგზე განაცხადა, რომ მარიხუანის წარმოება სამედიცინო და კოსმეტიკური დანიშნულებისთვის კანონით მკაცრად დარეგულირდება. მისივე თქმით, ამის მიზეზია "ქაოტური და კანონსაწინააღმდეგო" პროცესების თავიდან აცილება.

"რისკები გვაქვს გათვითცნობიერებული, რომ არ შეიძლება კულტივაცია მცენარისა და ამ ნივთიერების იყოს სამართლებრივი ჩარჩოს მიღმა, ამიტომ გადავწყვიტეთ, რომ მკაცრად რეგლამენტირებული იყოს".

რაც შეეხება ინვესტორებსა და ამ ბიზნესით დაინტერესებულ პირებს, პრემიერმა განმარტა, რომ ამ ეტაპზე ეს არის მეორე და მესამეხარისხოვანი საკითხი.

საქართველოს შინაგან საქმეთა სამინისტრო სამთავრობო გუნდთან ერთად მუშაობს კანონპროექტზე, რომელიც მარიხუანისგან წარმოებული მედიკამენტების ექსპორტზე გატანას გულისხმობს.

მარიხუანის მიერ დამზადებული სამედიცინო მედიკამენტების მოხმარება ლეგალურია მსოფლიოს არაერთ ქვეყანაში, მათ შორისაა დიდი ბრიტანეთი, ავსტრალია, ნიდერლანდები, აშშ-ს ზოგიერთი შტატი, კანადა, ურუგვაი, ისრაელში და პორტუგალია.

ამავე თემაზე: