"მინდა მოვუწოდო მოსამართლეებს, მათი ძალიან მაღალი სტატუსიდან გამომდინარე შეეცადონ და თავი შეიკავონ საჯარო დისკუსიისგან. მინდა ვთხოვო ასევე პოლიტიკოსებს, რომ იქნებ მოხდეს სხვა თემებზე გადართვა", - პრეზიდენტი გიორგი მარგველაშვილი მოსამართლეებსა და პოლიტიკოსებს მიმართავს.

პრეზიდენტის განცხადებით საჭიროა ქვეყნის ისეთი უმნიშვნელოვანესი სახელმწიფო ინსტიტუტის საჯარო განხილვისაგან დაცვა, როგორიცაა საკონსტიტუციო სასამართლო.

გიორგი მარგველაშვილის მოწოდებას არ ითვალისწინებენ საპარლამენტო უმრავლესობის წევრები. პარლამენტის ფრაქცია ქართული ოცნების თავმჯდომარე გიორგი ვოლსკი პროცესების პოლიტიზირებაში ნაციონალურ მოძრაობას ადანაშაულებს.

მისი თქმით, დაკვეთილი იყო პოლიტიკური კრიზისის შექმნა და ნაციონალურმა მოძრაობამ მოსამართლეთა პირველი კოლეგია შექმნა პაპუაშვილის, ვარძელაშვილის, ერემაძისა და კოპალეიშვილის შემადგენლობით, რომლითაც შეეძლოთ გაეჩერებინათ საქართველო.

ერთიანი ნაციონალური მოძრაობის წევრი სერგი კაპანაძე აცხადებს, რომ ქართულმა ოცნებამ საკონსტიტუციო სასამართლოს პარალიზება პროცესის პოლიტიზირების მიზნით მოახდინა და ეს პირველ რიგში ეხება რუსთავი 2-ის საქმეს.

საკონსტიტუციო სასამართლოს რუსთავი 2-ის საქმესთან დაკავშირებით განაჩენი ამ დრომდე არ გამოუტანია.