გირჩის საპრეზიდენტო კანდიდატმა, ზურაბ ჯაფარიძემ წინასაარჩევნო სარეკლამო კამპანია ყველაზე ცნობილ პორნოსაიტზე Porn-Hub-ზე დაიწყო. ინფორმაცია პირველად ამის შესახებ ერთ-ერთმა ფეისბუქმომხმარებელმა გაავრცელა.

ფოტო: ზურაბ ლომიძე / Facebook

ზურა ჯაფარიძემ ინფორმაცია On.ge-ს დაუდასტურა. PornHub-ის ვებგვერდზე მან ორი ბანერი განათავსა სხვადასხვა წარწერით:

  • არ გპირდებით ზომის გაზრდას!
  • მეტი სექსი, მეტი თავისუფლება!

როგორც ჯაფარიძე On.ge-სთან ამბობს, იდეა გირჩის წევრებში დაიბადა და ეს "ჩვეულებრივი ბიზნესგადაწყვეტილებაა". ჯაფარიძის თქმით, 8 სექტემბერს განთავსებულ ბანერებს ოთხ საათში 40 ათასამდე ჩვენება ჰქონდა. საპრეზიდენტო კანდიდატის ინფორმაციით, ჯერ არ აქვთ გადაწყვეტილი რა თანხას დახარჯავენ ამ კამპანიაში.

"ერთი მომხმარებელი საქართველოდან საშუალოდ რვა-ცხრა წუთს ატარებს პორნჰაბის საიტზე. მთელი ამ დროის განმავლობაში შეიძლება პერიფერიული მზერით ხედავდეს ჩემს ბანერს. ჩემი აზრით, ათასჯერ უფრო ეფექტური რეკლამაა, ვიდრე ერთად აღებული ყველა სხვა კანდიდატის სატელევიზიო თუ ქუჩის რეკლამა-სპექტაკლები," — ამბობს ზურაბ ჯაფარიძე.