შინაგან საქმეთა სამინისტრო დინამო არენაზე გასამართ საქართველო-ლატვიის საფეხბურთო მატჩთან დაკავშირებით, დღეს, 9 სექტემბერს უკვე მეორე განცხადებას ავრცელებს. შსს საზოგადოებას მოუწოდებს, არ გადასცდნენ გამოხატვის თავისუფლების დასაშვებ ზღვარს, რათა საფრთხე არ შეექმნას საზოგადოებრივ წესრიგს ან ადამიანთა უსაფრთხოებას.

უწყების ცნობით, ნებისმიერმა დესტაბილიზაციამ საფეხბურთო მატჩის დროს, შესაძლოა გამოიწვიოს თამაშის შეწყვეტა და უდიდესი ზიანი მიაყენოს როგორც ქართულ ფეხბურთს, ისე მთლიანად ქვეყნის იმიჯს.

"ძალადობის ან დესტაბილიზაციის მცდელობის ნებისმიერი ფაქტი იქნება დაუყოვნებლივ აღკვეთილი პოლიციის მიერ, ხოლო საზოგადოებრივი წესრიგის ნებისმიერი დამრღვევი, განურჩევლად სქესისა, რელიგიისა, სექსუალური ორიენტაციისა, პოლიტიკური შეხედულების, ეთნიკური წარმომავლობის თუ სხვა ნიშნისა, კანონის სრული სიმკაცრით აგებს პასუხს", — წერია განცხადებაში.