თანამედროვე ტელესივრცის ლიდერი ეკრანებიდან სცენაზე გადაინაცვლებს. HBO-ს პროდიუსერების განცხადებით, ფანებს შეუდარებელი და დაუვიწყარ შოუ, ანუ სამეფო კარის თამაშების საკონცერტო ტური ელოდებათ. ინფორმაციას ამის შესახებ შოუს კომპოზიტორი რამინ ჯავადი ტვიტერის საშუალებით ავრცელებს.

Sky News-ის ინფორმაციით, სამეფო კარის თამაშების საკონცერტო ტურნე აშშ-ს მასშტაბით ჩატარდება. ტურნეში მონაწილეობას მომღერალთა გუნდი და ორკესტრის სრული შემადგენლობა მიიღებს. 28 ქალაქში დაგეგმილი საკონცერტო ტურის ტრანსლაციას ფანები ტელევიზიით იხილავენ.

სამეფო კარის თამაშების აღმასრულებელი პროდიუსერების, დევიდ ბენიოფისა და დ.ბ ვეისის განცხადებით, ეს იქნება სულისშემძვრელი, გამაოგნებელი და ფანტასტიური შოუ, რამინ ჯავადის ძლიერი კომპოზიციების წყალობით.

კომპოზიტორი რამინ ჯავადი აცხადებს, რომ ფანებისთვის ძალიან მნიშვნელოვანი იქნება ცოცხლად შეიგრძნონ ის, რაც მათ საყვარელი შოუს თანმხლები მოვლენაა.

"თანამედროვე ტექნოლოგიებისა და მუსიკის ჰანგების საშუალებით ფანებს შვიდ სამეფოში მოგზაურობის კიდევ ერთი საინტერესო საშუალება მიეცემათ"- ამბობს რამინ ჯავადი.

სამეფო კარის თამაშების მუსიკალური ტურნე სტარტს 2017 წლის 15 თებერვალს, კანზას სიტიში, მისურის შტატში აიღებს, შემდეგ კი ნიუ-იორკს, ლოს-ანჯელესს და სხვა დიდ ქალაქებსაც ეწვევა.